Nia na poy gipadangat nga balita ni Higalang Tabian (ngalan gipugngan) bahin sa nindot nga gihimo ni Mayor Johnny V. delos Reyes (JVR) sa usa ka gasoline station diha sa Bulacao, Talisay City, diin maoy suki sa mga tigpatubil nga mga opisyal sa gobiyerno diha sa buhatan sa Talisay City Hall.
Nakurat si JVR human makamatikod nga ang maong gasolinahan nga maoy utangan nila’g gasolina, ang orihinal nga presyo sa bill nga miabot sa iyang lamesa, gituboan og 10%. Kini sukad pa sa miaging administrasyon nga gipulihan niya sa paglingkod. Unsa man ning tuboa? Interest sa utang? Wala gyu’y ideya ang bag-ong mayor ning maong kuwestiyonableng transaksiyon.
Mihimo si JVR og kuting pakisusi bahin niini ug dihang iyang nasayran ang nagpahiping hinungdan, dihadiha nakahukom siya nga mobalhin dayo’g laing gasoline station nga utanganan alang sa iyang mga opisyales, kinsa kuwalipikadong mogamit ning matang sa pribilihiyo nga gihatag sa gobiyerno.
Husto na ang presyo sa gasolina ning bag-ong gasoline station nga ilang gihimong bag-ong suki. Wala nay gipatong nga 10%. Ang fair market value na gyud maoy gibasehan.
Nakadayeg ang mga Talisaynon sa gibuhat ni JVR. Hasta si Higalang Tabian, kinsa kanunay gyung naniid sa mga pamaagi sa mayor, misaludo sab. First time nga nakapuntos kuno si JVR sa iyang personal daily mayor’s scoreboard.
Nanghinaut ang maong tigpaniid nga unta magpadayon na sa paggamit si JVR sa kait-on sa iyang utok. Ug dili ang sobrang kahumok sa iyang kasingkasing. Ug mipuno si Tabian, nga mosamot pa iyang belib kun mapa-improve ni JVR ang mga makaluluoy’ng pasilidad ug serbisyo sa ilang Talisay City Hospital.