Medyo laing paminawon kun nabuhi ta sa patay, di ba? Apan ang kamatuoran niana, daghan baya ang nabuhi pinaagi sa patay. Kay dili man usab hibintahaan ang makuwarta ini. Daghang nadato sama sa negosyo sa punerarya, gani mga luho nagserbisyo sa pag-atiman alang sa mga patay. Naa pa gyu’y negosyong nindot kaayong memorial parks nga namaligya’g lote alang sa patay nga buhi pa.
Ug naa pay mag-inilogay nga mag-away pa sa ospital bisa’g nagtinga pa ang pasyente, gikontrata na ang serbisyo kung mamatay. Kay may komisyon ihatag ang punerarya. Usahay maguol kay malaygay nga dugay mamatay. Tingali og nag-ampo nga madali na unta aron makakomisyon iyawat may pamugas. Mora lang nig komedya apan mao kini ang sitwasyon nga nagalihok sa atong palibot.
Unya may lain-lain pang mga diskarte nga nabuhi sa patay. Duna na tay nadunggan nga kun asa dunay patay nga gihaya pa, may mga grupo nga makasapi usab kay ang trabaho mao ra ang kunohay magminatay sa paghilak.
Aron pagsimpatiya sa namatayan ug paghatag o pagpabati og pagbangutan. Dugangan pa sa pundok sa mananabtan nga makasapi sad sa ilang serbisyo.
Di lang kay kana ra, naa say uban nga way lain gibantayan kun di kung may patay, ighaya abtik kayo sa pagbilar nga magdala pag lamesa para magbuntag og lingawlingaw samtang nagpinustaay. May makasapi man kun makadaug pero kalab-anan maminghoy. Apan maayo na lang kay libre man sab ang painit. Hinuon nakatabang man sad kini nga maalegre o dili mingawon ang namatyan.
Apan ang lintunganay gayud sa tema karon nga atong hatagan og dakung pagtagad, kadtong kahimtang sa atong kaigsoonan nga gikan sa mga lagyong probinsya. Nga de-pamilya pa mangadto sa dakbayan manimpalad bisan og way kadangpan o klarong kapuy-an. Wa pa gyu’y trabaho nga kasagaran anaa sa mga menteryong pampubliko, nakaobserbar tingali kita nga may daghang nagpuyo.
Sagad nila nabuhi na lang sulod sa menteryo nga giagwanta ang kalisod nga mangatug lang diha sa mga nitso o musuleyo. Nga makasapi lang kun may patay ilubong. Ang uban manglimpyo o manggalam og panteyon nga ang suweldo unya na ig-abot sa adlaw sa mga patay. Pait ug makaluluoy kaayo di ba? Busa dili maayo nga isugal ang kahimtang nato nga mamasin pa sa way kaseguroan sa dapit nga pagaadtoan ilabi na nga mangita pag remedyo nga kapanginabuhian.