Ang gipakita sa mga rebelding MNLF sa padayon nga pakiggubat niini sa militar didto sa Zamboanga nagpasabot nga di sila gusto og kalinaw.
Tungod kay gusto sila og gubat, mao kini higayon nga ipakita sa mga sundawo nga mao usab kini ang ilang gusto aron masukod kun kinsay nindot og mga armas, kinsay daghan og bala, ug labaw sa tanan kinsay daghan og sundawo.
Makaluluoy hinuon ang mga sibilyan nga nagpuyo sa maong lugar busa angay nga ipakita sa kagamhanan ang puwersa niini nga di angay magpalupig sa mga rebelde.
Ang katawhan maoy angay panalipdan sa mga sundawo kay daghan kaayo ang mapagan kun molahutay pa og dugay ang maong gubat.
Gawas nga madisturbo ang panginabuhi sa matag pamilya, madisturbo usab ang pag-eskuyla sa ilang mga anak.
Sa miaging adlaw gihagit ni Pres. PNoy ang mga rebelde kun unsay ilang gusto, gubat o kalinaw?
Kining mga rebelde nga sakop ni Nur Misuari di sila mosugal sa ilang kinabuhi kun way maayong pasalig gikan ni Misuari nga ilang lider.
Kun unsa kaisug ang mga rebelde nagtuo kita nga mas labaw pa kaisug ang mga sundawo sa goberno sa pagpuhag kanila.
Tungod kay kasamok ang ilang gusto, di kini angay nga luag-luagan pa sa mga sundawo.