Buksan karong adlawa ang Press Freedom Week dinhi sa dakbayan sa Sugbo. Mga sakop sa working media, apil ang mga support staffs sa mga sibyaanan sama sa TV, radyo ug sa pamantalaan mosalmot sa parade.
Buyno, naandan na man gayud nga matag Press Freedom Week daghan ang giandam nga mga kalihukan apil ang paghatag og dugang ideya sa mga bag-ong sakop sa media kabahin sa propesyon nga gusto nila nga sudlan.
Wala pa kaayo ko makakuha og kasayuran apan naandan na nga hapit matag gabii adunay kalihukan nga giandam ang tigpasiugda alang sa kalingawan ug katagbawan sa mga sakop sa media.
Sa akong giingon adunay “freedom†kadtong mga kusog kaayong moinum og beer sa paghubog sa ilang kaugalingon, apan tambag lang nga kalma kay peligro karong panahona.
Bitaw, alang sa mga kauban ko sa industriya, atong hangpon ang unang adlaw sa pagsaulog nato sa Press Freedom Week!!!
* * *
Nakalitan ang mga drayber sa kinalit nga operation sa Land Transportation Office (LTO) didto sa Sitio Maracas, Lahug kaniadtong Biyernes sa hapon hangtud sa gabii.
Daghan gayud ang mga nadakpan kay wala man sila masayud nga may mga LTO road enforcers nga naghimo’g operations. Apan duna g’yuy nakaikyas nga miagi lang sa checkpoint area.
Nagsunod ko sa usa ka kotse nga blue (wala na nako i-take note ang plate numbers, basta daan-daan na ang maong awto) gikan sa Barangay Busay. Punder g’yud ang iyang tail lights, basta ang brake lights.
Gitawag nako ang usa sa mga lider sa LTO nga naghimo sa operation apan wala sila makabantay kay gabii na ug dili kaayo maila ang maong sakyanan nga wala bay suga sa luyo kay nagsiga man ang atubangan.
Wala na lang ‘sab ko maninguha nga ako ang modakop kay nag-drive man ‘sab ko’g sakyanan. Ang ako lang ba, kamong mga tag-iya og sakyanan sa gabii, siguroa ninyo nga magsiga ang inyong tail lights ug headlights.
Importante man gud nga kompleto sa suga ang atong mga sakyanan kay layo ra kini sa peligro nga madam-agan. Paita, daan pa ang atong sakyanan unya walay suga, samot nga bati tan-awon ang atong mga sakyanan?
Ang akong sakyanan, awto ug motor, gisiguro g’yud nako nga mosiga ang mga suga kay mauwaw ko nga pundir ang suga. Alang niadtong mga nadakpan sa miaging Biyernes, mirisi ninyo.
* * *
Sa City Hall, usa ka tiguwang nabalian g’yud tawon sa iyang bukog sa wala nga bukton. Nalamba siya kay dangog kaayo ang tiles nga sawog sa passage way adtong nag-uwan.
Naay building administrator diha nga hinganlan og Emiliano Cruz wala gayud makaatiman niini.