Pagkadali ra g’yud sa panahon uy. Kining maong tabloid nga pamantalaan mora’g magsaulog sa ika-19 na ka tuig gikan sa iyang pagkamugna.
Mora lang og bag-o pa kaayo kadtong higayon nga gipatawag kami ni Sir Jiji Gullas kaniadto, kami ni Mr. Juanito Jabat ug si Beverly Lomusad nga maoy editor sa The Freeman niadtong higayuna. Kami si Beverly maoy nagkasabot nga Banat News maoy ihingalan sa mantalaan nga among pagamugnaon duha ka semana gikan sa among miting. Paspas lagi kaayo ang kalamboan.
Mao kadto nga giawhag g’yud ko ni Sir Jiji, presidente sa The Freeman kaniadto nga motabang g’yud paghimo og mga “write-up†para sa Banat News bisan og dia ko magsuwat sa The Freeman. Nahukman namo nga Banat News ang ihingalan sa mantalaan kay nagpasabot kini nga ang newspaper dili magpanuko sa pagpatik og mga balita bisan kinsa ang maigo.
Mao kana ang rason nga sa akong Renbor Patrol nga tingali, 17 ka tuig na ‘sab, walay kulba-kulba ang mga birada kun adunay makita nga kahiwian sa atong kagamhanan.
Nauwahi lang hinoon kining akong lindog kay wala man ko’y luna para kagahapong adlawa. Congratulations sa mga kauban nako sa Banat News!
* * *
Daghang mga tawo nga miundang pa sa pagkaon og isda tungod kay nahadlok sila nga basin og ang isda nga ilang paliton nakakaon og patay’ng tawo gikan sa nalunod nga barko.
Tinuod, dili gayud nimo kalikayan ang pagduda. Apan kun dagko nga isda mora’g dili man kana kuha sa mga mananagat nato diha sa dapit nga nalunoran, gikan kana sa lagyo nga dapit sama sa Mindanao. Dili ‘sab hinoon imposible nga ang mga isda nga gikabalak-an nga nakakaon og nadugta na nga lawas sa tawo nakaabot sa Mindanao. Apan ako wa g’yud moundang pagkaon, ilabina kun dagku nga isda.
Ayaw mo kahadlok uy. Apan kun mga kinhason gani, kana mora’g may pagka delikado tungod sa “oil spill†nga basin makadaut kanato. Matud sa kadagkoan sa DENR nga kun subra na sa 2 millimeter nga oil ang masagol sa usa ka litro nga tubig, peligro na sa atong panglawas. Kagahapon gani, si Mayor Michael Rama gidala ang mga sakop sa City Hall media didto sa Pasil Fish Market. Pwerteng daghana nga makaon uy ug ang mga kauban ko nga sila si Philipp Cerojano ug Ely Bolonos gihamon-hamon lang ang mga dagku kaayong pansat.
* * *
Congrats sa bag-ong acting treasurer sa dakbayan sa Sugbo – si kanhi city accountant Diwa Cuevas! Si Ma’am Diwa maoy gitudlo ni Finance Secretary Cesar Purisima sa maong katungdanan.