Kanunay andam

Naa na say laing trahedya nga nahitabo sa kadagatan diin matud pa sa balita dunay daghang nangatiwas nga kinabuhi.

Nagbanggaay ang duha ka barko -- usa padung sa Mindanao, ang kontra padung Sugbo.

* **

Matag hitabo ingon niini -- bangaanay og duha ka barko sa halapad nga kadagatan -- mahinumdom kita sa usa nato ka kauban sa pameriodiko ug sa iyang gitawag nga “safety first practice.”

Inig saka gayud og barko ug human naka-setup sa iyang teheras, kining atong kauban sa buhat mangita ug mokuha dayon og usa ka life jacket nga iyang himuong unlan.

* **

Dili tungod kay nahadlok og sea travel ning atong higala, apan matud niya “maayo tong preparado ta kanunay.”

Daghan ang nangatawa kaniya -- nganlan siya’g talawan sa uban -- apan wa niya kini igsapayan.

Iyang gikutlo si James Bond kinsa kuno nag-ingon: “We live only once.”

* **

Kataw-anan tuod kining atong kauban sa buhat. Kataw-anan, apan dihay usa ka hitabo diin siya usab ang nikatawa. Nibahakhak. Usa ka gabii niana samtang naglawig na ang barko, dunay komosyon nga nahitabo. Ang mga pasahero nagkabuang pangita’g life jacket kay nagdahum namilegro ang barko. Apan duna ra diay iro sa usa ka pasahero nga nakabuhi.

“Hahaha. Ako na sang turno ang pagkatawa kay duna na man kong daan pinili nga life jacket sa akong ulohan,” matud pa niining atong higalang periodista.

* * *

TRIVIA. Happy birthday ngadto sa atong suking magbabasa nga si Pacita Loo diha sa Ubay, Bohol...Greetings sa atong mga loyal readers diha sa Lapu-Lapu City lakip na ang mga PUJ drivers sa paradahan sa merkado.