Dihay panultihon sa Iningles nga nag-ingon: “Men don’t cry, only boys do.†Sa ato pa mga bata rang lalaki ang mohilak, dili ang mga dagko na.
Tinuod baya ni. Kay kasagaran gud mauwaw man nga makit-an ang mga dagkong lalaki nga mohilak o naghilak.
Nganlan dayon sa uban nga babayoti ang lalaking mohilak.
* * *
Apan niadtong gabii sa miaging Domingo daghang lalaking dagko ang nanghilak pagdaug sa Gilas Pilipinas kontra Korea sa FIBA Asia. Way mga bata nga nanghilak. Hehe.
Mao pa man gud toy higayon nga atong napilde ang Korea ug ang nakatam-is pa mao nga human ato nasud dayon ta sa finals kontra sa Iran kang kansang mga player pulos higante.
* * *
Adtong gabhiuna mga dagkong lalaki nga dunay pagmahal sa Pilipinas nihilak gyud. Mauwaw ka kun dili makakita’g gugma sa nasud kay dungog sa Pinas ang nangibabaw atong gabhiuna.
Bisan gani ang mga polis nga gi-assign sa MOA nakahilak. Diha say edad-edaran na nga pari kinsa nasiplatan nga nagpunay og pamahid sa ilang luha samtang ang walang kamot nagwarawara og bandera natong papel.
* * *
Gamay ra man ning atong tingog apan tugoti nga ipuno ta sa mga pagsinggit sa dakong kalipay sa atong mga kaigsuonan.
Ug uban mi sa pagtunol og pahalipay ngadto sa Gilas Pilipinas team labi na ni Coach Chot Reyes, mga players, ug mga coaches nga nitabang kang Chot.
* * *
TRIVIA. Mangumusta kita sa atong mga higalang magbabasa sa Banat News diha sa mga merkado sa Minglanilla, Talisay ug San Fernando. Daghang salamat sa inyong suporta sa Banat News.