Nagkagubot ang mga opisyal sa Bureau of Customs gumikan sa pagkawagtang sa dul-ang 300 ka sakong bugas humay.
Hinuon kun ibutang ta nga tag P1,000 ra ang prisyo sa matag sako, aw pila ray P300 mil nga bahin-bahinon pagbayad sa mga opisyal ug kawani nga may labot sa pagbantay sa maong mga butang.
Kinsa man gyu’y may tulubagon niini, ang mga security guard, ang mga taga bodega, ug ang hepe sa departamento nga maoy tig-atiman sa maong mga butang isip iyang command responsibility.
Imposibli kaayo nga mawagtang ang maong mga butang nga tag 50 kilos ang gibug-aton sa matag usa ka sako.
Kay kinsa man gyu’y pasinginlan nila, ang mga ilaga, ha? Kay ngano ba makahurot ba sa 297 ka sako sud lang sa 2 ka buwan ang pila ka milyon nga ilaga.
Wa baya’y nabalita nga giatake sa minilyon ka ilaga ang mga bodega sa custom ug mihurot og kaon sa mga sinakong bugas.
Daghan ang nangutana tungod ba kay sinakmit ang maong mga bugas, gikompiyansahan na lang sa mga nagbantay niini?
Kun ang guwardiya nga gitugyanan sa yawe sa bodega sa maong mga bugas nakigkonsabo sa mga kawatan, aw kanang sikyoa kinahanglang maoy silotan uban sa hepe nga gibahinan niya sa ilang kinitaan.