Nahimong komedya sa mga tawo sa mosuroy nga tihik nga politiko nga walay bulsa ang gisul-ob nga sapot ug karsones nga maoy hinungdan nga dili kini makatanyag og pagkaon o bisan sa pagpainom na lang og bugnaw nga tubig kay walay kuwarta nga ikapalit kay walay bulsa ang nasul-ob nga karsones o senina.
Ang lain nga paghingalan sa mga tawo sa tihik nga mga politiko sa panahon sa ilang pagpangampanya mao nga aduna man tuod kini bulsa ang karsones o senina nga gisul-ob apan mubo usab og kamot ug maglisod sa pagkuot sa pagkuha og kuwarta nga ipalit og pagkaon o mainom sa mga tawo nga nagtapok.
Ang dili tihik nga politiko sa panahon sa ilang pagpangampanya aduna kini idalit nga pagkaon o mainom dili lang alang sa pagkabig sa mga tawo nga magtapok sa pulong-pulong nga ilang gihimo kun dili tuyo usab nila nga busog kini ug masulod sa kaisipan ang tanan nilang isulti.
Ang mga pagya sa tawo sa tihik nga politiko nga walay bulsa mao na usab karon ang gisugyot sa pipila ka mga opisyal sa kagamhanan nga maoy ipasul-ob sa mga kawani sa Bureau of Customs (BOC) ang walay bulsa nga karsones o isul-ob niining senina.
Ang pagsugyot nga walay bulsa ang isul-ob nga karsones o senina sa mga opisyal ug kawani sa BOC maoy mga paagi sa pagsulbad sa gialigar nga naghitak nga pangurakot.