Nasentro sa daghang pagsaway ang Bureau of Customs ning panahona tungod sa pagpangasaba ni Presidente Noynoy Aquino sa maong ahensiya atol sa iyang ika-upat nga SONA niadtong Hulyo 22.
Ang reaksiyon sa mga opisyal ning ahensiyaha, pinanguluhan ni Customs Commissioner Ruffy Biazon mao ang pagsang-at sa resignasyon, apan wala dawata ni Noynoy. Nunot niini, miisyu si Biazon og memo ngadto sa 17 ka mga district collectors ug 32 ka sub-port collectors sa pagbiya sa ilang puwesto, kini aron mahatagan siya og halapad nga pagbuot kinsay iyang ibutang sa mga puerto.
Gituyo kini aron masumpo ang korupsiyon sa customs.
Apan sa akong pinordoy nga pangagpas, bisan balibalihon pa nang mga opisyal og assign bisan asang puertoha, dili mawagtang ang korupsiyon sa adwana tungod kay kining problemaha nagsubay na sa kaugatan sa maong ahensiya.
Sistema ang problema.
Ang BOC adunay hilabihan kadaghang mga opisina nga nag-duplicate na gani ang ilang mga trabaho. Ang BOC adunay daghang mga deputy commissioners – Revenue Monitoring Group, Internal Administration Group, Enforcement Group, ug Intelligence Group ug uban pa. Kining mga deputies adunay mga opisina bisan ngadto sa mga puerto nga ang mga sakop maoy mangolekta og “patong†ngadto sa mga importer.
Ang padrino system tinuod usab dili lang ngadto sa mga opisyal nga gibak-apan sa mga hawod sa Malacañang, kun dili ang mga tag-as nga opisyal sa customs adunay mga “favored†broker ug importer.
Sama pananglit nianang W.O. nga magkanunayan sa BOC-Cebu. Kining maong Chinese giingong magbayaran og buhis nga ubos kay sa gisabutan nga benchmark. Luoy ang ubang broker kay estriktohon, unya kun estriktohon kining Insika, modayon og name-drop ni kanhi PRO-7 director Marcelo Garbo, mga opisyal sa NBI-7 ug CIDG.
Unya nangangkon kining higala nilang Cebu Customs District Collector Edward dela Cuesta ug Biazon.
Atol sa pagbukas sa mga nasakmit nga mga smuggled Vietnam rice, sumala sa mga nakaila kaniya nga didto kini naglaaglaag sa Customs holding area bisan wala kini labot sa presscon, samtang wala kini badlonga sa mga sakop sa Customs police.
Magdamgo ang kadagkoan sa customs nga mawagtang ang korupsiyon, apan kining ingon niining tawo nga dili gustong mobayad og hustong buhis libre kaayong makalaaglaag sulod sa customs premises.
Nakaila man ang kadagkoan sa adwana niining tawhana. Nasayod usab sila unsay iyang estilo sa negosyo sa adwana didto sa Manila, unya gitugotan lang kini nilang makasulod-gawas sa customs sa Sugbo.
Unsa man ni?