Adunay balaudnon si Sen. Grace Poe diin giulohan kini og “Plain Writing for Public Service Act.â€
Ubos sa maong balaudnon, ang tanang buhatan sa gobyerno gimanduan sa paggamit og simpling lingguwahe o mga pulong sa ilang mga order kun pasuguan, komunikasyon, mensahe, etc.
Ang katuyuan niini mao nga aron masayon masabtan ang maong mga sinuwat dili lang sa mga kawani sa buhatan kundili usab sa ultimong mga katawhan.
* * *
Gihangop sa usa ka propesor sa kolehiyo ang maong balaudnon ug ang katuyuan niini.
Matud pa ning maong propesor, daghan siyang nabasahan nga mga sinuwat gikan sa nagkadaiyang buhatan sa gobyerno diin nalisdan siya sa pagsabot labi na niadtong mga sinuwat sa Iningles.
Naa kunoy mga gisangunan sa pagsuwat og mga komunikasyon, mensahe, kasuguan, etc. kinsa maninguha gayud sa paggamit og mga laglum nga pulong (labi na Iningles) aron ingnon nga hataas ang nahibaw-an sa pulong nga ilang gigamit.
* * *
Mao tingali kini ang gustong korehian sa balaudnon ni Senador Poe.
Matud ni madam Poe nagtuo siya nga kun simple writing ang gamiton sa mga buhatan sa kagamhanan masayon sila nga masabtan sa katawhan ug madali usab ang pag-implementar sa mga kasuguan nga buot ipatuman sa maong mga buhatan.
* * *
Simpli kaayo ang gustong ipatuman sa balaudnon ni Senadora Poe. Ug tingali naay pipila sa mga manggialamon ug mga nagkupot og daghang degree nga mangyam-id sa kasimpli sa maong balaudnon.
Apan naa bayay daghang mga magsusuwat nga miinsister nga ang simple writing maoy labing maayong matang sa writing kun gusto ang writer nga sayon masabtan ang gusto niyang ipasabot.
* * *
TRIVIA. Mangumusta kita sa atong mga higala diha sa mga merkado sa Talisay ug San Fernando. Salamat sa inyong way hunong nga suporta sa Banat News.