Kinahanglan ang usa ka piniling opisyal, labi na ang mayor ug gobernador, magtuon sa responsibilidad ug katungod sa iyang pwesto aron dili sila tawgong tanga o way kabangkaagan.
Naay daghang mga higayon nga ang mayor o gobernador dili magiyahan og maayo sa iyang mga tawo. Resulta usahay mapasakaan siya’g kaso ngadto sa Ombudsman.
Madawat hinoon kining katarungan sa pagtudlo sa mayor og sakop sa iyang pamilya sa mga pwesto nga sinsitibo apan duna kini limitasyon.
Sama sa pagtudlo ni Talisay City Mayor Johnny delos Reyes sa iyang kaugalingong anak isip city administrator. Suma sa akong suod nga mga abogado nga nakasupak kini sa balaud nga nagdili sa nepotism.
Kinahanglang magbanay usab ang mga naghupot og gahum nga dili sila mabuwasot sa laang ug dili makakubit sa lansis sa ilang mga "higala" nga buot diay sa mopuli sa ilang pwesto.
* * *
Gituki na sa Commission on Elections (Comelec) ang election protest nga gipasaka ni kanhi kongresista Tomas Osmeña ug kanhi bise mayor Joy Agustos Young.
Apan samtang dugay pa kaayo ang proseso usa mapakanaug ang hukom sa Comelec kalabut sa maong protesta aduna nay disinformation kon gipakatap nga tabi nga midaug na kuno si Osmeña pagka-mayor ug Young pagka-bise mayor.
Katungod ni bisan kinsang pildiro nga mopasaka og protesta ug kinahanglang atong dawaton kun unsay hukom sa Comelec kalabut niini. Mao man gayud kini ang kanunay nga mahitabo dinhi sa Pilipinas nga walay moangkon nga napildi kay kuno sila gitikasan.
Apan dili maayo kun maghimo kita’g bakak nga propaganda kay makahimo kini og dili maayong resulta sa atong ekonomiya. Maglibug ug mahadlok ang mga investors sa pagbubo og puhunan kun dunay political instability sa usa ka dapit.
Alang sa kaayuhan sa Cebu City akong awhagon kadtong mga balhibuon og dila sa paghunong na niining maong black propaganda kay dili tinuod nga nadisisyonan na ang protesta ni Osmeña ug Young.
* * *
Nilunga gayud ang kadagkuan sa Philippine National Police (PNP) sa gibarugan ni Mayor Mike Rama nga siya maoy adunay katungod sa pagpili og hepe sa kapulisan sa Cebu City gikan sa lima ka mga ngalan nga papilian kaniya sa Camp Crame.
Human sa dugay nga paghuwat, si PNP Chief Director General Alan Purisima mitudlo kang Sr. Supt. Noli Romana, nga pinili ni Rama, isip Cebu City police director.
Ako nagpaabut nga tungod sa pagsaway ni kanhi PNP Regional Director Marcelo Garbo, Jr., si Romana maninguha gayud sa paggukod sa mga gambling ug drug lords.
Nagtoo ako nga kun dili mohimo og maayong labok si Romana, nga ipatangtang dayon siya ni Rama.
* * *
Akong greetings ngadto sa no. 1 bosswoman sa White Gold Club nga si Ms. Sonia Go nga kanunay nga mobasa sa Banat News ug nagsunod sa "Hello Cebu, Maayong Buntag Pinoy" ug sa "CCTN News."
* * *
Email: msr1144@yahoo.com