Dugay na nga panahon nga gihingusgan sa atong kagamhanan ang pagsulbad sa suliran sa illegal nga drugas nga maoy hinungdan nga ang Philippine Drug Enforcement Agency, (PDEA) Philipine National Police (PNP) ug ang mga sakop sa National Bureau of Investigation (NBI) nagtinabangay sa paghimo’g operation sa tinguha nga madakpan ang mga nagpasiugda niining molupyo usab sa maong lugar.
Dihang si kanhi Police Regional Office Director Marcelo Garbo maoy nangulo sa PRO 7 daw wala kaayo ikataho ang mga dinagkong kalampusan sa kapolisan sa pagdakop sa mga tawo nga nalambigit sa maong illegal nga kalihokan.
Ang kadaghanan sa katawhan nagtuo nga nahingpit sa PDEA ang ilang kaakohan sa pagpakunhod sa suliran sa illegal nga drugas dinhi sa Central Visayas sanglit ang mga ahensiya sa kagamhanan nga gitahasan sa pagsulbad sa maong suliran nagmalampuson gayod sa ilang pagbantay.
Nunot sa maong pagtuo sa katawhan daw naukay na lamang kini dihang pagbiya sa pangulo sa kapolisan dinhi sa rehiyon ug mihulip ang bag-ong liderato wala pa gani manginit ang sampot sa paglingkod sa iyang katungdanan maoy nagbansiwag sa mga taho ang labot sa dinagkong kalampusan sa operasyon sa NBI ug kapolisan nga misampot sa pagkasikop sa langyaw nga Negarian national nga mi-check-in sa motel sa reclamation area sa dakbayan sa Mandaue.
Nasakmit sa kapolisan ug NBI 7 ang minilyon nga kantidad sa shabu nga makapahibulong kaayo kun diin man kini mag-agi nga higpit man ang pagbantay sa Mactan Cebu International Airport (MCIA) ug mga polis sa Adwana.
Apan sa pagkawagtang sa sinakong bugas sa Adwana wala na usab mahingangha pa ang katawhan kun nganong nagpadayon ang paglusot sa binultong shabu nga maoy hinungdan sa nagpadayong pagkuyanap niini.