Daghan ang naikag nga mokaon sa mga kan-anan sa “night market†sa Colon magabii diin anaa ang nagkalainlaing klase sa sud-an.
Naay litson nga baboy, isda nga sinugba ug tinuwa, mga barbecue, mga sinugba ug sinabaw nga sud-an imong matilawan.
Hinuon kun mosil-ing ug motutok ka sa ilang hugasan, may mga karenderia nga daghan ang tubig ug may namaligya usab og pagkaon nga tagsa ra ka container ang tubig.
Ibutang sa duha ka planggana nga panghugasan, diin ang usa ka planggana maoy buboanan sa mga kinan-an ug ang laing usa ka planggana maoy para finishing.
Di sila kas sa tubig kay gikan sa unang hugna sa mangaon hangtud nga sila mamauli, way ilis-ilis ang maong tubig ug adto na kini iyabo inigpamauli na nila.
Burot na sa kuwarta nga halin sa ilang mga baligya ang bulsa sa tag-iya ug wa tan-awa niini kun maayo bang pagkasilbi niya ang iyang mga kustomer.
Kay ang iyang pagtuo nga nakapakaon siya, ug wa siya maninghag ug sa laktud maayo ang iyang pag-abi-abi kanila, apan ang makaluluoy nga kustomer way kalibotan nga ang plato nga iyang gikan-an wa kahinloi sa limpyo nga tubig.
Busa wa gihapon niya kasilbihi ang iyang kustomer sa husto nga pag-alagad.
Tungod kay ang negosyo nga dala ang paglingla sa iyang kustomer, di makapadelanto sa tawo kundi mahibus ra gihapon kini sa hinay-hinay o dinaliang paagi sa gaba.
Nakadaginot ang maong negosyante sa tubig ug misamot kadako ang iyang ginansya.
Apan sa hinayhinay moabot ang dimalas sa iyang kinabuhi nga halos di na siya makabangon pa tungod kay sa iyang konsensya nasayud siya nga may pagkuwang siya sa iyang mga kustomer.
Hinuon mahimong moumento makadiyot apan sa kaulahian hapakon sa mga dagkong suliran, sama sa bug-at nga sakit ug uban pang mga katalagman nga masugamakan sa maong negosyante nga makapahapay kaniya.