Sa dili madugay itudlo na ni Pres. Aquino si kanhi Sen. Panfilo "Ping" Lacson sa usa ka komisyon batok sa kurapsiyon.
Matud pa sa mga kasaligang tinubdan gikan sa Malacañang nga gihashasan pa ang draft executive order nga magtukod niining maong presidential commission.
Sumala pa nga ang maong buhatan nga pangulohan ni Lacson adunay duha ka commissioner ug usa ka task force nga adunay 100 ka mga sakop nga hanas sa imbestigasyon.
Samtang dili pa klaro kun unsa gayud ang gahom sa maong buhatan apan gisiguro nga dili kini mosapaw sa gimbuhaton sa Office of the Ombudsman.
Ako nagtoo nga dako og matampo si Lacson sa pagsumpo sa mga binuang sa gobiyerno ug sa pribadong sektor sigun sa iyang gipakitang labok sa dihang siya pa ang hepe sa Philippine National Police (PNP).
* * *
Anaa nay kongresista nga mipasaka og balaudnon sa pagwagtang sa Sangguniang Kabataan (SK) ug sa pagkanselar sa gikatakdang piniliay sa SK karong Oktubre.
Si Kong. Edgar Erice sa Caloocan City mipasaka og House Bill 1122 nga mag-usab sa Republic Act 7160 kon Local Government Code aron paghanaw sa SK ug pulihan kini og Barangay Youth Council (BYC).
Ang BYC, sumala sa balaudnon, pangulohan sa labing batan-ong sakop sa konseho sa barangay. Ang iyang mga sakop mao ang mga konsehal sa barangay nga chairperson sa mga komitiba sa sports, environment, education ug culture and arts. Wala kini silay mga sweldo.
Ang ubang kongresista gustong wad-on ang budget sa SK aron mapugngan na ang kurapsiyon. Ako nagtoo nga kun mawala na ang gahin alang sa SK nga mominus na kaayo ang mag-interes sa maong posisyon.
Yuna pa, dili ba maayo usab nga ihunong kining paghatag og pork barrel ngadto sa mga kongresista ug senador aron mahunong na usab kining korapsiyon sa maong mga balay-balauranan?
* * *
Unsa ka tinuod kining akong nadawat nga taho gikan sa akong mga duwende sa Kapitolyo nga anaay mga tawo nga nanukad na aron makapagpangilkil?
Kini kunong tawhana nitabang kang Gob. Junjun Davide niadtong niaging piniliay apan iyang gi-junk sila si Gay Yapha sa pagka-kongresista pabor kang Gwen Garcia ug si Gigi Zaballero pabor kang Ian Zambo ug Binghay.
Iya na usab kunong giduol ang mga kontraktor nga aduna pay kobrahonon sa Kapitolyo ug gipasaligan nga mabayran sila kun modugo ug mohatag sila’g porsiyento.
Apan ang labing impluwensiyado mao kining tawo nga sikit kaayo sa gobernador. Nakita nako siya nga nitupad na ni Gob. Davide.
Mag-ampo lang kita nga dili matinuod kining akong kabalaka. Hinaut pang matuman kadtong "honest Capitol" nga gisaad sa gobernador.
* * *
Si kinsa man gayud ang nagpukpok og bato sa ulo ni Joseph Niño Pugoy, 16 anyos taga Bgy. Ermita, Cebu City? Ang gipasanginlang si Konsehal Gerry Carillo nanghimakak man sa pasangil.
Aduna man hinuon siya’y gitudlo nga maoy mihimo niini apan gibuhian sa mga pulis kay way lig-ong ebidensiya.
Alang kanako kinahanglang ikiha kini si Konsehal Carillo aron dili magduda ang mga tawo nga ang mga ginikanan sa biktima ug mga pulis nahadlok o napalit sa konsehal ug aron usab malimpiyohan ni Carillo ang iyang pagkatawo labi na kay daghan nang tabi-tabi nga atong nadungog bahin kaniya.
* * *
Email: msr1144@yahoo.com