Usa ka dakong sunog ang miulbo niadtong Hunyo 27, 2013 sa Sitio Mahayahay, A. Lopez Street, Barangay Calamba diin ubay-ubay gyud nga panimalay ang naugdaw. Sama sa naandan naglisod ang atong kabomberohan sa pagkombati sa kalayo gumikan sa kahagip-ot sa mga dalan ug maong di makapwesto atong mga dagkong firetrucks.
Pun-an pa sa mga tawo nga anaa na taliwa sa dalan magpundok. Ang pakigkombati sa sunog daghan kaayo og mga angayang ikonsiderar sanglit dunay mga lugar nga lisod kaayong masulod ug maglisod gyud paglihoklihok atong kabomberohan. Ang kasagaran nga himoon sa atong kabomberohan og interior nga bahin sa usa ka lugar ang masunog mao ang pagsumpay-sumpay sa mga fire hoses.
Sa maong paagi tawo na lang ang makasulod nga maoy motira sa kalayo. Unsa may epekto kun taas ang pagsumpay sa hose? Ang epekto niini mohinay ang pressure niini.
Mas labing maayo nga duna untay road re-blocking ang local government units aron sa panahon dunay sunog nga mahitabo sa usa ka lugar dali ra kaayong maka- penetrate atong kabomberohan.
Dapat dunay political will ang mga local chief executives aron paghawan sa mga hagip-ot nga lugar. Bisan unsaon namo og paningkamot nga madali ang pagpalong sa sunog, kun, ang mga kadalanan pwerteng gagmaya maglisod gihapon atong kabomberohan.
Dugangan pa sa mga usosero nga magtapok gyud tunga sa dalan daw nagtan-aw ba og usa ka salida. Hinaut nga makat-on na unta ang publiko nga sa panahon dunay sunog nga tubagon atong kabomberohan magkat-on unta kining mopadaplin aron dili makabalda sa among operasyon.
Sa pikas bahin, tugoti ko paghatag og tribute sa usa ka ligdong ug respetadong opisyal sa kabomberohan nga mitaliwan na ngadto sa laing kalibotan. Si INSP. RAMONITO R. ALEGRADO, BFP nga maoy Deputy Fire Marshal sa Carcar Fire Station mipanaw na niadtong Hunyo 26, 2013 sa edad nga 55. Si Sir Alegrado usa sa mga opisyal sa kabomberohan nga akong gi idolo gumikan sa iyang pagkaligdong sa trabaho, manggihatagon, masinabtanon, makamao, ug labaw sa tanan very approachable. Sa tanang sakop sa pamilyang Alegrado labi na kang Mrs. Alegrado ug sa akong kauban sa buhat FO1 Japeth Alegrado, akong mga pahasubo. Sa kataposan, on a lighter note, akong birthday wishes kang SFO2 Paul Gonzales nga nagsaulog sa iyang adlaw’ng natawhan karong adlawa. Kauban nako kini sa Office of the Provincial Fire Marshal Cebu Province. Happy Birthday Sir Paul.