Gihangop sa mga drayber ang hingpit na nga pagwagtang sa mandatory drug testing sa ilang pagkuha og lisensiya sa pagmaneho og sakyanan nunot usab sa hingpit na nga pagpatuman sa balaod nga Republic Act No. 10586 kun Anti-Drunk and Drugged Driving Act of 2013.
Ang kasayuran nga pagwagtang sa mandatory drug testing alang sa pag-apply og drivers licenses nunot usab sa gipadayag ni Senador Vicente Sotto III nga maoy nangamahan sa RA 10586.
Matud pa ni Sotto nga ang RA 10586 wala lamang magwagtang sa requirement nga pagpa-drug test sa mga license applicants kun dili nagwagtang na usab sa dugang galastohan nga P200.
Gipasabot sa senador nga ubos sa bag-ong balaod nga ang drayber mahimo lamang nga ipaubos sa drug testing sa higayon makasinati kini og aksidente o masakpan kini sa mga law enforcer nga naghinubra kakusog ang pagpadagan, nag-ikis-ikis ang dagan sa gimaneho niining sakyanan ug uban pa.
Sa nasayran nga ang kasagaran sa mga drayber maoy ilang gibagolbol ang gipatuman nga mandatory drug testing alang sa ilang pagkuha og lisensiya sa pagmaneho og sakyanan kay nakadugang lamang kini sa ilang galastohan.
Nunot sa ilang pagbagolbol maoy ilang gipadayag nga ang maong rekisito nga gipatuman sa Land Transportation Office (LTO) wala gayod makatabang sa tinguha sa kagamhanan nga ang mga adik-adik dili makabaton og lisensiya sa pagmaneho kay masakpan na man nga naggamit sila og illegal nga drugas sa drug test nga pagahimoon.
Gitataw sa pipila ka mga drayber nga marokoy ang mga adik-adik nagpasabot nga manggialamon ang mga adik-adik kay panahon sa mga adlaw nga mokuha sila sa ilang lisensiya sa pagmaneho og sakyanan dili man una sila mogamit og illegal nga drugas mao nga sa drug testing nga pagahimoon maoy mogawas nga negatibo o dili sila adik-adik.