Miabot niadtong miaging semana dinhi sa Sugbo ang dili mominus 20 ka mga 40 footer nga container vans nga may sulod nga mga pinalusot nga mga mahalong sakyanan. Ang miabot nga mga kontrabando gikan kini sa nasud sa China ug Korea.
Sigun sa mga dokumento ang sulod sa mga container vans mga computer parts, replacement parts ug mga assorted accessories apan ang gibug-aton sa maong mga container vans makapaduda. Sigun sa naandan ang mga 40 footer container vans nga adunay sulod nga mga accessories gibana-banang dili molapas sa pito ka libo ka kilo ang gibug-aton niini apan ang nangabot nga mga container vans niadtong miaging semana perting mga bug-ata, milapas sa 22 mil ka kilo ang gibug-aton niini.
Sa paglili sa atong amigong duwende milugwa sa maong mga container vans ang mga mahalong sakyanan nga nagluklok sa sulod niini. Ang uban sa maong mga sakyanan tibook ug wala gayod pisapisaha busa usa ka dakong kalapasan sa atong balaud ang pagdala niini dinhi sa nasud.
Sa pagsulod ning kontrabando nga atong gihisgotan mingaw ang mga taga Bureau of Customs ambot kun ngano nga unta kun duna ni sila’y masakmit nga mga kontrabando saba man kini sila kaayo, gani ila pang imbitahon ang ilang mga labaw didto sa kaulohan. Unsay buot ipasabot sa ilang kahilom ning misulod nga kontrabando, may kasabotan kaha nga naumol ang player niining maong kontrabando nga si JL ug ang mga opisyal sa Bureau of Customs dinhi sa Port of Cebu?
Nganong walay mitingog sa mga taga X-Ray division ning misulod nga kontrabando, wala ba sila makakita sa mga sakyanan nga nagluklok sa sulod sa mga container vans? Kun wala makakita niini ang taga X-Ray division nagpasabot ba kini nga gubaon ang ilang mga machine o wala lang mamonitor sa pangulo niini ang iyang mga tawo tungod kay kanunay siyang wala sa iyang opisina kay perming nagyampungad sa Edies Hotel. Atangi ang dugang kalamboan niining maong binuang.
* * *
Ako diay nga pasalamatan si Mam Sanchez nga kanunay mobasa og Banat News ilabi ning atong lindog ug sa iya usab nga gihatag nakong similya sa tilapya. Salamat mam.