Thumbs up mi sa desisyon ni Mayor Mike Rama nga panindotan ug himuon nga mas madanihon kon attractive sa mga dayo ug turista ang Taboan Public Market.
Gimanduan sa mayor si City Administrator Jose Poblete ug City Market Administrator Raquel Arce sa pag-improve sa Taboan aron mamahimo kini nga ikapanghambog natong mga Sugbuanon.
* * *
Kining Taboan market nahimo na kining usa sa mga tourist destination sa dakbayan diin mga langyaw nga turista ug bisan pa ganing mga domestic nga turista modugok sa maong merkado.
Salted fish kon buwad nga isda maoy atraksyon sa Taboan. Ang mga buwad nga gibaligya diha pulos presko kay gikan gayud sa tinubdan ug mga bag-ong “haun†gikan sa buwaranan.
* * *
Bisan sa wa pa mimando ang mayor nga paninduton ang Taboan napanindot na ug nahimo nang attractive kon madanihon ang Taboan. Limpyo ug areglado ang pagpahimutang sa mga tindahan ug stalls. Salamat sa paninguha sa market administrator ug sa kooperasyon sa mga negosyante sa buwad sa maong merkado.
* * *
Labing maayo alang sa turismo sa Sugbo kun mapanindot ug mamahimong attractive pa gayud ang Taboan, ang giilang numero uno sa mga merkado diin buwad ang kinadak-an nga produkto.
* * *
TRIVIA. Maayong buntag sa atong mga higala diha sa Alaska-Mambaling-Alumnus ug diha sab sa Tisa ug Labangon. Salamat sa inyong nagpadayon suporta sa Banat News.