Usahay masagmuyo kita sa atong kaugalingon kun may makita kitang mga tawo nga dili managsama ang kahimtang sa kinabuhi. Ug makaingon kita nga dili patas ang Dios sa paghatag sa atong panginahanglanon. Kay aduna may nag-antos sa hilabihang kalisod… naa poy hamugaway ug naa say mga adunahan.
Ang kamatuoran sa kinabuhi, sa sinugdanan gilalang kitang tawo sa Dios aron magmalipayon taliwala sa paraiso nga mao ang Eden. Apan lagi kay nakalapas o nakasala sa gibaod sa Dios, gihinginlan aron mapahawa og dinhi nagsugod, nga unsa man ang atong mga panginahanglanon… maghago na kita.
Karon sa atong panahon, daghan na kaayong tawo nag-iyahay paghimog paagi aron makab-ot ang ilang mga tinguha o pangandoy. Adunay nangapakyas.. ang uban nagmalamposon…apan managsamang may gibating kalipay ug kaguol. Bisan pa niini, gihatagan kita’g kaalam aron buhaton ang gusto nato sa kinabuhi.
Sagad nato mobuhat lang segun sa maagpasan o mag-agad lang kutob sa pamasin nga kuno moabot ra ang iyang gipangandoy. Maayo man kini kun nihit pa ang tawo. Apan karon haskang daghana sa kakompetensya nga nagtuon pa sa inantigong pamaagi uban ang kaabtik.. aron di maapsan mawad-a’g paglaom.
Angay ning atong panahon, mas maayo nga pahimuslan nato ang pagplano og dagkong mga pangandoy sa kinabuhi… total pribilihiyo ug libre man kining ihatag kanato. Buhaton nga may sakripisyo nga molahutay sa pailob. Alisto sa paglihok ug mabinantayon sa mga lakang nga di mausik ang imong paghago.
Unsa may gidak-on sa pangandoy mo mao kanay giya nimong subayon. Manikaysikay bisan ginagmay.. ayoha lang pagdumala ang kita mo. Modako o magamay ang kita, disiplinaha ang pagtipig nga mapugsanon kanunay alang sa katumanan sa pangandoy. Matngoni lang ang lawas mo di maabuso nga masakit.
Ayaw kaayo seryosoha basta kanunay lang positibo nga naglihok tumong sa inanay nga pagmonitor sa kalamboan nga posibleng katumanan sa pangandoy mo. Antosi ayaw pugosa nga maahat kun di pailobi hangtod hingpit nga makab-ot ug ayaw kapungot o ma-stress ka kun tak-an kas pagpaabot, padayon lang gyod.
Kay unsa man kadako sa pangandoy nato ning kinabuhi-a, kun monunot lang kitang malipayon sa pagpailob ug pag-antos uban ang pagtoo, ihatag gyud kana sa Dios ang tanang pangandoy nato sa kinabuhi nga kita magmalamposon.