Daghang nabalaka niining pagluha og dugo sa Birhen sa Fatima kay alang kanila usa ka dakong kasub-anan ang muabot sa Sugbo.
Ang uban miduyog sa paghilak tungod kay nabalaka sila basin kun ang umaabot nga eleksyon dugoon ilabi na nga nabalitaan na nga may mga goons ang kasagarang mga politiko sa norte ug habagatang bahin sa lalawigan.
Ang uban nagtuo nga naghilak ang Birhen kay basin adunay mga bug-at kaayong mga sakit nga muabot sa tawo nga mosingil og daghang kinabuhi.
Nagkalainlain ang gihunahuna sa tawo paghatag og kahulogan sa dugo nga giluha sa Birhen.
Apan usa ka pari nga nakaalinggat sa paghilak sa maong larawan miingon nga nagkinahanglan kini og usa ka mabinantayon nga pagtuon.
Kay daghan man gong mga milagro nga sa kaulahian nadiskobrehan nga mga minao-mao ra usab sa tawo.
Susama niadtong milagro didto sa Villa Bulsita sa barangay Bulacao, Cebu City kaniadto nga sinako ang kuwarta nga natigom sa tag-iya sa Santos nga giingong nagmilagro unya nadiskobrehan na lang nga binuang ra diay ang maong milagro.
Tinuod husto ang giingon sa pari nga susihon , tun-an ug analisahon ang maong milagro nganong miluha man og dugo ang larawan.
Ang mga santos o larawan gihimo sa nagkalainlaing materyales sama sa tango sa elepante, kahoy, puthaw, apog ug uban pa nga naporma pinaagi sa mangungulit.
Human maporma ang dagway. Lawas, mga kamot, mga tiil, gipintalan ug gisul-oban og senina ug may uban pa nga butangan og mga alahas nga genuine.
Pagkahuman gibendisyonan sa pari aron mahimong gamhanan nga moayo na og mga masakiton, busa basta mahipos lang pag-ayo kun may mga sunog sa butangan kaniya mas una pang mamatay ang pari nga naghatag gahum kaniya.
Unsa ka gamhanan ang santos o imahe kay sa pari nga naghatag kaniya og gahum? Kay ang pari mamatay man, samtang ang larawan basta maampingan lang, matapos na lang ang kalibotan magpabilin nga di mamatay?