Murag di katuohan nga samtang nagsaka ang gidaghanon sa populasyon matag tuig sa Pilipinas mokibra na hinuon ang magminyo.
Mao bitaw nga kusog kaayo ang pagdaghan sa matawo nga bata matag tuig tungod sa kadaghang magtipon nga bana ug asawa matag karon ug unya.
Nakarekord ang NSO og tag-tulo ka bata nga matawo matag segundo o 180 ka bata matag minuto, 4,320 matag buwan ug 51,840 matag tuig.
Kining gidaghanona sa matawo nga mga bata matag tuig, mugna kini sa daan na nga magtiayon nga magpunay og panganak ug sa mga bag-ong magtiayon nga mao pay pagpanganak.
May duha ka klase ang magtiayon, nga mao ang magtiayong kasado o legal ug ang di kasado nga nagtipon isip mansibado.
Ang pagtipon sa managhigugmaay isip magtiayon nga way kasal-kasal may nagkalainlain ang hinungdan ug usa niini mao ang kaapiki sa ikagasto sa kasal, kaha way gusto ang ginikanan busa nagtaban na lang ug uban pang hinungdan.
Tungod kay kun magkasabot na ang managhigugmaay nga magtipon na lang nga way kasal-kasal ilabi na kun nakontrahan sa ilang mga ginikanan mahimo ra man kaayo an g ilang gusto.
Kun nagustohan sa mga ginikanan apan wa pay ikagasto ang pamanhonon sa kasal, mahimo ra gihapon ug malagmit mao kini pipila sa hinungdan nga mikunhod ang nagpakasal apan misaka ang nagtipon nga way kasal-kasal.
Kun ingon niini ang dagan nga mokunhod ang magpakasal, angay na kining susihon sa mga otoridad nganong wa na kaayoy nagpakasal.
Ang NSO kugihan kaayo molusad og survey nga mosuta kun pila ka magtiayon matag tuig ang di magpakasal, ug unsay mga hinungdan niining tanan.
Kun masuta nga gumikan sa kadako sa gasto sa kasal ang hinungdan, angay nga pakubsan usab sa mga tigkasal ang ilang singil sa bayad sa kasal.
Apan labaw sa tanan kinahanglang porsigehon sa mga lider sa relihiyon nga gipasakopan sa mga magtiayong mansibado nga magpakasal sila kay sugo sa Dios ang pagpakasal sa lalaki ug babaye nga gustong magminyo.