Saulogon sa mayoridad sa katawhan sa kalibotan atol sa gitawag nga Holy Week o Semana Santa karong semanaha ug ang kamatayon ni Cristo sa krus sa Biyernes Santo. Saulogon usab sa mga katawhan ang pagkabanhaw ni Cristo sa adlaw’ng Domingo, ang ikatulong adlaw human mabugto ang Iyang gininhawa sa krus nga gilansangan Kaniya didto sa bukid sa Kalbaryo.
Kada tuig gisaulog kini sa mayoridad sa populasyon sa tibuok kalibotan uban sa paghalad og mga sakripisyo sa lawas.
Kay ang mayoridad sa katawhan sa kalibotan nagtuo nga ang tanang tawo maoy gipakamatyan ni Cristo sa krus aron sa pagpasaylo sa ilang mga kasal-anan ug balikon Niya aron dad-on sa langit sa adlaw sa katapusan.
Mayoridad sa katawhan nagtuo usab nga ang pagsakripisyo sa ilang lawas niining Semana Santa usa na ka matang sa pag-alagad kang Cristo aron nga Iyang bugtian og kaluwasan sa adlaw sa paghukom.
Kun napatik sa Biblia ang bahin sa kamatayon ni Cristo sa krus, napatik usab kun ang Iyang pagpakamatay alang ba sa tanang katawhan sa kalibotan.
Sa mga magtutudlo sa relihiyon nga nasayud bahin sa tinuod nga hinungdan sa kamatayon ni Cristo sa krus, nganong hikawan man ninyo ang inyong mga miyembro sa kamatuoran nga nahasulat sa Biblia kinsang mga tawhana ang natubos sa dugo ni Cristo nga naula sa krus. Kay kun di ninyo tudloan ang tawo sa kamatuoran kaanugon baya sa ilang pagsakripisyo nga wa diay kapuslanan tungod kay di maoy hustong matang sa pag-alagad kang Cristo ang ilang gisunod.
Sa matag usa nga gustong masayud sa kamatuoran bahin sa kahulogan sa kamatayon ni Cristo sa krus nga nahasulat sa Biblia, hangyoa ang inyong lider sa relihiyon nga mobasa sa Biblia bahin niini ug ayaw pagsugot nga sa iya rang baba nga magtumotumo kanimo bahin sa tinuod nga kahulogan sa kamatayon ni Cristo.
Hangyoa ninyo ang inyong mga lider nga ipabasa ang mga sitas sa Biblia nga nagtudlo bahin sa hustong pag-alagad kang Cristo ug sa pag-alagad sa Dios.
Kay kun di nimo kini sutaon karong may kinabuhi ka pa, basin baya magmahay ka inig-abot sa adlaw nga mobalik na si Cristo sa yuta aron hukman ang mga buhi ug minatay.