Lisud gyud usahon ang Pinoy. Ambut ngano. Sa Amerika daghan kaayong mga kapunongan ang Pinoy. Kini tungod kay ang matag usa kanato gustong mag-presidente. Gusto tang mag-presidente tungod kay mas bright ug mas kamao kita kay sa uban.
Unya, gawas nga mag-iyahay ta’g organize og kaugalingong mga pundok, mag-kompetensiya pa gyud, magdinautay, inay magtinabangay. Mao kini kita.
Mao ni ang nahitabo kanatong mga senior citizens dinhi sa atong dakbayan. Wala gyud ta mahiusa, both nationally ug locally, kay lagi di gyud ta magkasabot. Ambut ngano.
Ubay-ubay nang mga barangay nga gumikan kono sa pagpanghilabot sa pipila ka barangay captain, nagkatibulaag ang mga senior citizens, nag-iyahay og tukod og kaugalingong mga pundok. Pastilan!
Mo-upat na ka tuig ang United Senior Citizens Multi-Purpose Cooperative of Cebu City, Inc., of course, duly accredited, recognized, ug registered sa Cooperative Development Authority (CDA).
Apan, wala kaayo ni molambo kay lagi, ang uban gustong motukod og kaugalingong cooperative. Daku ang katingala sa CDA ngano nga ingon kita niini. Inay ilang suportahan ang existing nga cooperative, aron molambo ug makahatag na’g tukmang pag-alagad ngadto sa mga miyembro, ila na hinoong pukanon pinaagi sa pagtukod og kaugalingong cooperative.
Maayo man gani kay sa akong tan-aw, dili mosugot ang CDA niini. Ka dakung kataw-anan kun ang matag chapter adunay kaugalingong cooperative.
Anyway, sa miaging general assembly sa United Senior Citizens Multi-Purpose Cooperative of Cebu City, Inc., napili kining mosunod nga mga sakop sa Board of Trustees: Dr. Nick Maglasang, Mary Aleonar, Engr. Dodo Abella, Flor Pesquera, Director Jose Gapas, Trify Palmares.
Audit Committee: Chit Lugo, Nick Ampatin, Doming Nacua; Election Committee: Vita Padilla, Serge Cantones, Fanny Velez.
Nganong nasuko man mo ining mga tawhana nga magtukod man gyud mo’g inyong kaugalingong kooperatiba?