Gitakda na usab sa City Hall ang pagpanghatag sa cash assistance sa mga senior citizen sa matag barangay sa Cebu City.
Maayo unta kun tun-an sa taga City Hall ang hustong sistema sa pagpanghatag nga di hiabtan og udto kini pinaagi sa pagdestino og 3 ngadto sa 4 ka kahera sa matag lamesa nga moatiman sa mga senior.
Ang kasagarang gihimo sa city hall may lamesa nga destinohan lang og tagsa ka kahera unya ginatos ang silbihanan nga senior.
Busa inig-abot og alas 12:00 hatdan og paniudto ang kahera, dayon mokaon kini atubangan sa mga tiguwang.
Ang mga tiguwang kinsa di mobiya sa ilang lingkoranan aron di mapulihan, bisan magkurog na ang tiyan sa kagutom mag-antos na lang ug magpanglad-ok intawon nga magsud-ong sa kahera nga magbuwa na ang baba og hinabhab sa iyang paniudto.
Nganong ingon man niini katamhangan ang kagamhanan nga unta kun destinohan nila og hustong gidaghanon sa mga kahera ang matag barangay, dali rang mahuman ang ilang trabaho ug di usab kaayo mahasol ang mga senior.
Kun ang katarungan, kuwang og tawo ang city hall, kay ngano, di ba mo makapamalihug sa taga barangay aron motabang sa pagsilbi sa mga tiguwang?
Gamay ra man kining problemaha, apan bisan unsa kagamay kun di himoon ang inutok nga sistema sa pagsilbi sa mga hingtungdang mga senior, makaluluoy kaayo sila kinsa ang uban bisan magkango-kango na magpailob sa pagpaabot bisan pila ka oras hangtud madawat ang ilang gipaabot.
Ang upat ka oras nga pinaabot, gaan kaayo alang sa mga batan-on, apan alang sa mga tiguwang bug-at ug hasol kaayo kini ilabi na sa adunay gipamati nga balatian.
Busa nganong di man tun-an pag-ayo sa taga city hall ang hustong sistema alang sa sayon ug sayo nga mahuman nga pagpanghatag sa maong hinabang sa mga senior.
Wa ba mo masayud nga mas sayon pa patumanon ang mga batan-on kay sa mga tiguwang sa gusto ninyong ipatuman nga mga kausaban sama sa paglinya, paglingkod ug uban pa?
Apan bisan unsaon katungdanan sa tanan nga respetohan ang mga senior citizen.