Sa tulomanon sa radyo, Senior Citizens Hour sa dyRC, usa ka chapter president sa senior citizens ning dakbayan, miduaw sa estasyon ug mipalanog sa iyang kasagmuyo sa mga opisyales sa ilang barangay nga nanghilabot sa kalihokan sa ilang chapter, pinangulohan gayud sa barangay captain.
Matud niya, ginamit ang ngalan ni City Director Pat Gabuya sa DILG, ang maong barangay captain, mipadala og mga sulat nga nag-awhag sa mga senior citizens pagpatambong sa miting aron pagpili og bag-ong presidente.
Nangutana siya unsay katungod sa mga barangay officials pagpahigayon og eleksyon sa ilang kapunongan; nganong sila man ang mopatawag og eleksyon?
Amo siyang gitambagan pagpadangat sa iyang formal complaint ngadto sa OSCA Head ning dakbayan, copy furnished: Cebu City Senior Citizens Council, City DILG, DSWS, ug DSWD regional office.
Hinaut nga maresolbar ang maong isyo, aron makalikay ang mga kapunongan sa senior citizens nga kagawngan sa pipila ka barangay Captain, sa tinguha nga mahiuyon sa ilang gibarugan sa politika. This is bad.
Sa ato nang gibalikbalik dinhi, as an individual senior citizen, tungod kay aduna kitay kaugalingon ug personal nga leaning sa politika, magkasungi ug magkabangi ang atong mga baruganan – apan, as associations, isip pundok sa mga senior citizens, usa ra ta.
Dili nato bungkagon, dili nato paawayon ang isig-nato ka pundok gumikan lang sa politika. Mao unta kini ang buhaton sa mga barangay captain, paghiusa sa mga senior citizens sa ilang barangay, regardless sa individual nga bulok sa politika.
Duna tay nadunggan nga dunay mga barangay captain nga nagtukod gyud og kaugalingong pundok sa mga senior citizens – giatbangan ang laing pundok gumikan sa pagduda nga atua mohilig sa pikas nga partido sa politika. This is bad.
Mahimo nga ang usa ka chapter president identified sa Type O sa Team Rama, apan, wala kini magpasabot nga ang tanan niyang mga sakop mouban kaniya. Sama nga kun ang usa ka barangay captain identified sa usa ka political party, wala kini magpasabot nga ang tanang molupyo sa iyang barangay monunot kaniya … gawas kaha kun iyang mapalit ang tibuok barangay.
Ang mga senior citizens adunay kaugalingong kabuot, di kinahanglang diktahan, labaw pang di mapalit. In fact, karong mga panahona, naka-decide na kinsay botohan. Sa ato pa, dili maka-influence ang mga barangay captain kinsay botaran.
Busa, ayaw awaya ang mga senior citizens, kay tingali unya hinoon adto sila mobotar sa imong kontra.