Matag panahon nga taliabot na ang election, magkalainlain ang hunahuna sa mga botante.
May mga botante nga di na motan-aw sa matang o kalidad sa kandidato nga ilang botohan, kay alang sa mga kabus ug kuwang sa hustong edukasyon, “basta may kuwarta tua ta.â€
May mga botante nga ang tan-awon nila sa kandidato mao ang abilidad sa liderato niini, kinaiya ug ang kapasidad niini kun dumadaog ba.
Apan alang kang Sir Jose “Dodong†Gullas ang Chairman sa The Freeman ug Banat News, edukasyon ug kinaiya sa kandidato maoy iyang tan-awon.
Di tungod kay usa siya ka educator ug tag-iya og unibersidad maoy hinungdan nga higpit ug estrikto siya nga mohimbis og kandidato, apan alang sa mga tigpaniid usa ka maayong pagtulun-an alang sa katawhan ang iyang gipamahin nga paagi sa pagpili og kandidato.
Kay sa pagkatinuod ania na kita sa modernong panahon, diin ang katawhan nagkinahanglan sa lider nga may panglantaw sa pag-apas sa panginahanglan sa sosyidad. Lahi ang nangaging mga panahon diin menus pa kaayo ang teknolohiya bisan tuod may kauswagan na ang siyensya, busa ang labing gikahinaman kaniadto sa katawhan mao ang kandidato nga maayong tawo kay maayo og kinaiya bisan menus og edukasyon.
Apan sa pagkakaron diin ang kaalam bahin sa teknolihiya, mga modernong sistema sa edukasyon mao nay giatubang sa modernong henerasyon, salikwaot baya usab kaayo kun ang mapili nga mga lider sa nasud sama sa president, mga senador ug mga kongresista, haguka og pundasyon sa edukasyon kay sa iyang kabiya sa hustong panukdanan sa kaalam pirme siyang maulahi sa pagpanday ug pagpaila og balaodnon kay mahawngan siya nga makig-atubang sa iyang mga kaubanan nga larino na kaayo manulti og English sa panahon sa ilang mga debate.
Busa husto ug tukma kaayo ang prinsipyo ni Sir Dodong nga sa moderno natong panahon, angay natong pilion ang mga kandidato nga may igong katakus mamunoan ug may lig-ong liderato.
May maayong kinaiya nga nagpasabot, maayong tawo, dili abusador sa gahum, walay record sa pagpangiriw sa salapi sa kagamhanan (kun siya incumbent ) ug di abusado sa gahum ug mao kini hiyas sa kandidato ni Sir Dodong Gullas nga maoy angayang sundon.