Gihimong gasa ni Sir Dodong Gullas ngadto sa 34 ka mga magtiayon ang libre nilang pagpakasal niining petsaha. Ang kasal sa magtiayon usa ka sagrado nga bugkos sa kaminyoon sa bana ug asawa.
Maayo man gani kay imbis ihalad ni Sir Dodong ang iyang panahon sa iyang pamilya kay atol man usab sa kasaulogan sa iyang birthday ang maong higayon, didto niya kini ihalad sa 34 ka parisan sa bana ug asawa .
Iyang gipakita ang iyang kaayo kay mao kini ang iyang gisaad nga matag pagsaulog niya sa iyang birthday, may ipahandom siya sa mga kabus gikan sa iyang kaugalingon uban sa iyang kapikas nga si Ma’am Nena.
Apan kining kasal nga iyang gipasiugdahan, butang nga di hikalimtan sa mga hingtungdang magtiayon ug bisan sa ilang mga anak.
Wa siya magpaabot og bayad o unsa mang bawos gikan sa magtiayon, apan igo na kaayo alang kaniya nga sa makausa pa di hikalimtan sa mga hingtungdan ang halandumong adlaw sa ilang kasal uban sa magtiayong nagpasiugda aron magpuyo sila nga legal sa panan-aw sa tawo ug sa Dios.
Kay ang pagpakasal maoy paghatag og dakong kahulogan sa kinabuhi ug pagpuyo sa magtiayon.
Ang unang magtiayon nga gipangunayan gayud sa pagkasal sa Dios mao si Adan ug Eva.
Bisan gidimalas sila human sa ilang kasal kay gihinginlan man sila gikan sa tanaman sa Eden, apan ang isyu nga gikinahanglang magpakasal gayud ang magtiayon nagpabilin tungod kay ang unang nagbaod nga gikinahanglan sa magtiayon nga makasal mao ang Dios.
Gikan niadto Iya na nga gisugo ang lalaki ug babaye nga magkahinigugmaay nga hiusahon sila pinaagi sa usa ka kasal, diin iyang gimando nga ang bana maoy ulo sa iyang asawa samtang ang asawa maoy magsilbing lawas tungod kay silang duha, usa lang sa Iyang atubangan ug Iyang pagbuot nga ang gihiusa pinaagi sa kasal di angay buwagon sa tawo busa sukad kaniadto ug hangtud karon suko ang Dios sa DIVORCE.