Pipila ka adlaw gikan karon hingpit na nga magsugod ang kampanya alang sa umaabot Mayo 13 nga eleksiyon.
Ang mga kandidato pagkasenador magsugod sa ilang kampanya karong petsa 12 sa Pebrero samtang ang lokal nga mga kandidato karong Marso 29.
Apan ang pangutana unsa ka andam ang buhatan sa Commission on Elections pagpahigayon sa piniliay karong Mayo?
Matud sa mga opisyal sa Comelec andam na sila. Gani sa niaging pipila ka adlaw atong nasayran nga dunay pipila ka mga resolution nga gipagawas ang ahensiya aron magsilbing giya sa mga sakop niini unsaon pagpahigayon ang piniliay. Usa sa mga bag-ong resolution nga gipagawas sa Comelec mao ang resolution number 9476. Gilatid dinhi ang mga lagda sa campaign finance and disclosure.
Ubos sa maong resolution gitukod ang Campaign Finance Unit nga maoy tahasan pagsusi kun nitug-an ba sa tinuod ang mga kandidato sa ilang gasto sa kampanya ug si kinsa ang mga nihatag nila og pundo alang sa kampanya.
Nindot ang tumong sa Comelec aron atong mahibaw-an diin gikan ang pundo sa ilang kampanya. Pinaagi niini sayon mahibaw-an sa publiko kinsa nila ang mopahimulos human unya sa eleksiyon.
Apan unsaon ni pagpatuman sa Comelec kun ang ilang mga buhatan way igong mga sakop pagtuman niini?
Pananglitan dinhi sa Sugbo ang average nga personnel sa matag-usa ka buhatan sa Comelec duha lang. Unsaon man nila paghimo niini kun ang tanang trabaho sila maoy mohimo?
Mismo ang regional director sa Comelec-7 nga si Atty. Temie Lambino miangkon nga dili nila mapatuman sa hingpit ang tanang resolution sa Comelec.
Kini tungod sa mga limitasyon sa ilang buhatan. Usa niini ang kakuwang og mga sakop. Gawas sa kakuwangan sa personnel, wala say igong kahibawo ug training ang ilang mga sakop paghimo sa trabaho.
Usa sa makasubo nga kasayuran ug kamatuoran mao ang pamahayag ni Lambino nga dili nila mapatuman ang balaod tungod kay gawas nga wala silay igong mga sakop labihan na ka karaan niini nga wala na masubay sa panahon.
Pananglitan ang filing sa statement of campaign expenditures. Giangkon ni Lambino nga nasayod sila nga way bisan usa ka kandidato nga nagtug-an sa tinuod apan wala silay gihimo tungod kay matud ni Lambino impraktikal na ang balaod nga nagsita og spending limit sa eleksiyon.
Sigun sa balaud ang matag lokal nga kandidato nga dunay partido gitugotan lang nga mogasto og P3 matag-usa ka botante samtang P5 alang sa mga independent.
Matud ni Lambino imposible ni nga matuman sa pagkakaron hinungdan nga ilang gipasagdan ang tataw nga mga kalapasan.
Maayong pahinumduman si Lambino nga bisan unsa pa ka jurassic sa balaod hangtud nga kini wala ni i-repeal sa kongreso magpabilin ning balaud nga angayan niyang ipatuman.
* * *