Adunay mga butang nga angay atong ihatag o igasa isip mahinungdanon nga regalo sa kinabuhi nga mao ang kalipay. Unsa man ning makalipay sa kinabuhi? Tukion nato ni aron magsilbing pahinumdom usab alang niadtong nalimot o wala lang gyud magtagad o kaha wa sad kahibawo kun unsa ang tinubdan sa kalipay.
Ang kina maayohang tambal nga ikahatag sa lawas nga mohimsog mao ning mga way sukdanan nga hingpit makapalipay sa kinabuhi.
1) Ang pagmahal. Makat-on kita nga ipabatyag sa buhat o pagbati ang atong pagpangga ngadto sa tanan. Makitawhanon, mapinanggaon ug di salingkapaw o paka-aron-ingnon.
2) Ang maayong kabubut-on. Kinahanglan andam kita kanunay motubag, motagad ug motabang sa atong isig katawo nga way pagpinig o pinalabi ni bisan kinsa nga kasilbihan. Ipatigbabaw ang kaangayan nga mopalig-on sa paglaom.
3) Ang pagkamatarong. Kanunay igawi o itul-id nga imatuto ang buhat nga matarong. Maantigo mo-aninaw sa sayop nga ipaila ang husto o katarungan. Mahimong modelo o kapanaminan nga nagtamod permi nga naa sa katarung.
4) Ang pagpasaylo. Binuhat kita nga daling mabikil sa kasaypanan. Angayan lang nga andam mohatag sa pagpasaylo. Aron sa pagpahimatngon nga mahimong mabinantayon nga dili ma-abusohan ang pagbuhat sa kasal-anan.
5) Ang pagmahal sa ginikanan. Di katumbasan sa salapi, ang pagmahal sa anak ngadto sa ginikanan. Di masukod ang kalipay bation sa katigulangan. Maoy gusto nila nga hangpon ug hatagan og dakung pagtagad o pag-amuma.
6) Ang pag-alagad. Nga unsa man ang nabuhat nato nga kaayohan sa isigka-ingon, atong isipon nga kini halad sa kabubot-on nga way pagpaabot nga kabayran. Ang Dios na ang mahibalo mobalos unya sa tanan mong panginahanglan.
7) Ang way kinutubang paghatag. Mas maayo nga daghan ang makadawat sa imong pagka-manggihatagon, nga malipayon nga kapuslan sa nanginahanglan. Mao kini ang hiyas nga ang kahitas-an mopadagaya sa imong katigayonan.
8) Ang pag-unong o tapat. Matinud-anon nga ipahimutang sa hustong lugar nga dili sab masobrahan nga mo-epekto na hinoon nga mahimo ta nga tanga.
Sayon ug yano ra ning mga butanga, nga mabatonan nato ang kalipay sa kinabuhi nga mopahimsog o mopataas sa atong pagkatawo, labi nas panglawas.