Kun United Nationalist Alliance (UNA) ang pabut-on, di madutlan sa balaod ang ilang mga alyado. Ang mga imbestigasyon nga ilusad batok sa ilang binuhatan klaro nga politikanhong pagpanggukod. Bisan ang pagpanaway nila kabahin sa lapad nga kampanya sa pagpakauwaw.
Mao nga kon UNA maoy pabut-on, di angay’ng silotan si suspendidong gobernadora Gwen Garcia bisan nakonbikto sa kasong administratiba batok niya. Di angay’ng imbestigahon si Gobernador Amado Espino sa Pangasinan bisan sa pasangil sa plunder ug ilegal nga sugal batok niya. Ug di angay’ng hilabtan ang pagwaldas ni Senate President Juan Ponce Enrile sa kuwarta sa Senado.
* * *
Naabtan og kapin sa duha ka tuig ang imbestigasyon sa kaso nga gipasaka ni anhing bise gobernador Greg Sanchez batok ni Garcia. Apan wa ni kapugong sa UNA sa pagpasangil nga gilaktod sa Malakanyang ang pagpahamtang sa unom ka buwan nga suspenso batok ni Garcia.
Si Executive Secretary Paquito Ochoa Jr., alyado sa pangu sa UNA nga si Bise Presidente Jejomar Binay, ang nipirma sa suspension order. Apan wa ning kapugong sa UNA sa pagpasangil nga si DILG Secretary Mar Roxas, nga klarong kaatbang nilang Binay ug Ochoa, ang nanghasi ni Garcia ug nipahamtang og martial law batok sa Pamilyang Garcia sa Sugbo.
* * *
Pundok ni Paolo Garcia, kamaguwangang anak ni Gobernador Garcia, ang nakit-an sa mga kamera sa media nga nangasaba ug nidukol sa opisyal sa kapolisan nga nagbantay sa tugkaran sa Kapitolyo. Apan wa ni kapugong sa UNA pagpasangil nga ang kapolisan nanghudlat sa mga Garcia.
Gipasagdan si Garcia ug pipila ka dumadapig nga magpabilin sa iyang buhatan ug ubang mga lawak sa main building sa Kapitolyo ug nagpatuyang sa pagkonsumo sa tubig ug kuryente sud na ron sa dul-an sa usa ka buwan human nasuspenso sa katungdanan. Apan wa ning kapugong sa UNA sa pagpasangil nga moggamit ang kapolisan og bangis nga puwersa aron pagpapahawa ni Garcia.
* * *
Tingali wa na lang gyoy laing masulti ang UNA. Tingali wa na lang gyud silay laing masaway sa pamunoan ni Presidente Noynoy Aquino. Unsaun man tuod nila pagdaot ang padayon nga paglambo sa nasudnong ekonomiya, ligdong nga pagpatuman sa higanteng mga proyekto ug paghiyos sa pangurakot sa labing taas nga mga ang-ang sa nasudnong gobyerno?
Gawas pa, kinahanglan ang UNA nga magsaba-saba samtang wa pa mahusay ang higante nilang kalibog. Maglisod pagtanyag sa ilang mga piliunon nga mas kasaligan nga mga alternatibo sa administrasyon. Kay ang tulo nila hari, silang Binay, kanhi Presidente Joseph Estrada ug Enrile di pa makabiya sa Malakanyang. Aron nga padayong makasawo sa kredito sa labing dagkong kadaogan sa pamunoan nga gipaluyohan sa kinabag-an sa katawhan.
* * *
Email: leo_lastimosa@abs-cbn.com