Ang National Statistics Office mipagawas og datos nga adunay 2.8 milyones ka mga pinoy nga wala’y mga trabaho samtang 7.2 milyones usab ang mga under employed o mga nagtrabaho pero ang ilang trabaho dili tukma o haom sa kurso nga ilang nahuman ug gamay ra ang suweldo.
Sa kadaghang tawo sa Pilipinas, 2.8 milyones lang gyod kaha ang gidaghanon sa walay mga trabaho? Unsa may gibasihan sa gobyerno sa ilang pag-ihap sa gidaghanon sa mga walay trabaho. Si kinsa ba ang ilang gi-ihap? Ang tanan gyud kaha ang ilang naihap? Ako ning gipangutana tungod kay may bag-o man ugod karong sukdanan o basihanan sa pag-ihap sa mga walay trabaho ang atong gobiyerno. Sa ilang bag-ong sukdanan o basihanan, dili na apilon sa pag-ihap sa gobiyerno ang mga tawo nga wala mangita og trabaho kay kining mga tawhana dili kuno gustong makatrabaho maong ang ilang giihap nga walay mga trabaho kadto lamang nangita og trabaho pero wala gayod makatrabaho.
Ang gobiyerno sa ilang datos miingon nga daghan nang trabaho sa Pilipinas pero daghan gihapon ang mga walay trabaho tungod kay wala magtakdo ang bakanting trabaho sa mga nangita og trabaho, wala pay kasinatian ang mga nangita og trabaho ug gamay ra upod ang suweldo maong moatras ang mga nangita og trabaho.
Karon nga nailhan na sa gobiyerno ang hinungdan nganong daghan gihapong wala’y mga trabaho, seguro iya nang masulbad ang suliran sa kakuwang og trabaho dinhi sa nasud pinaagi sa pagmugna og trabaho nga mohaum sa mga nangita og trabaho, pagdawat sa mga nangita og trabaho bisan kun wala pa kini kasinatian ug pagmando sa mga magpapatigayon sa paghatag og dakong suweldo niadtong mga makatrabaho.
* * *
Gitimbang-timbang pa ni suspended Governor Gwendolyn Garcia kun modayon ba siya sa pagsayaw sa Sinulog grand mardigras karong Domingo. Nakadungog man ugod ang gobernadora ni acting governor Agnes Magpale nga miingong dili siya makaseguro nga makabalik pa sa Kapitolyo ang gobernadora inig human niya og sayaw sa Sinulog. Hinuon ning uwahi, ang acting gobernadora miklaro nga dili niya pugngan ang suspendidong gobernadora kun adto gihapon kini mopauli sa Kapitolyo inig human niya og sayaw.
Para nako mas maayong gamiton sa suspendidong gobernadora ang Sinulog nga iyang graceful exit diha sa Kapitolyo ug mopauli didto sa ikatulong distrito ug mosugod na sa iyang pagpangumpanya sa pagka-kongresista kay wala siya’y mahimo kun anha lang siya magmokmok sa Kapitolyo. Akong unsolicited nga tambag nimo Gov. uli lang sa didto sa ikatulong distrito unya balik lang unya kun pabalikon ka na sa labaw’ng hukmanan pinaagi sa ipagawas niining TRO.