Kun sila pabut-on

Tulo ka mga dalagang guwang (spinsters) nga nagduwag mahjong didto sa usa ka sityo sa Labangon ning dakbayan sa Sugbo nalingaw og tabi bahin sa mga krimen nga nanghitabo sa siyudad.

* * *

“Makalingaw ang tulo,” matud pa sa bugtong lalaki nga ilang gikauban sa lamesang-madyonganan. “Naminaw ra ko sa ilang nagkadaiyang opinyon kabahin sa punto nga ilang gidiskutihan.”

* * *

Matud kuno sa usa ka madyongera: “Kun ako’y pabut-on panumbahon ang tanang nagsamok-samok sa katilingban. Mga sagbot...”

* * *

Mitubag kuno ang laing madyongera: “Bitaw oy. Kun wa kanang mga karaho, malinawon ang atong siyudad. Uyon kong panumbahon kana sila wa nay kaso-kaso pa sa korte.”

* * *

“Uyon sab ko,” matud kuno sa lain pa gyung madyongera. “Aron masayon na lang ang trabaho sa akong pag-umangkon nga polis.”

* * *

Sa laing bahin, didto sa usa  ka pubilc forum sa Manila, ang kadaghanan sa mga nanambong-- mga ginikanan ang kadaghanan -- mipadayag usab sa ilang pag-uyon sa “summary penalty” batok sa mga nagsamok-samok sa katilingban. Sama sa mga holdaper, killer, isnatser, etc. Wala hinoon i-esplikar sa balita kun unsay pasabot  sa “summary penalty.”

* * *

TRIVIA. Belated Christmas & New Year greetings sa atong mga higala diha sa Alumnus, Mambaling. Daghang salamat sa inyong suporta sa Banat News.