Kataw-anan ug dili katoohan ang panagna sa babaye nga nagpaila nga “fortune teller†kinsa mitagna nga mapilde si Kongresista Tomas Osmeña ug ang hapit tanan sa iyang mga konsehal nga sakop sa Bando Osmeña Pundok-Kauswagan.
Miapil ko sa mga tawo nga mikatawa pagkabasa sa maong panagna ni Luzviminda Noel, kinsa nagpaila nga Madam Luz, kay milutaw nga dili kredible ang iyang panagna kay usa ra kuno ka kandidato pagka konsehal sa BOPK ang makadaug sa eleksyon karong Mayo 13.
Hagiton nako si Madam Luz nga makigpustaanay ko niya, ang iyang P500 akong pustaan og P1,000 nga ang iyang panagna nga usa ra’y modaug sa mga kandidato pagka konsehal sa BOPK, dili mahitabo. Unsa, sukol ka? He! He! He!
Bisan pila pa ang imong kwarta Madam Luz pustaan nako og imatuod nako nga mapilde ka g’yud. Dili pagpakaubos sa mga kandidato sa Team Rama no, apan kataw-anan man gud kay tiaw mo usa ra ang modaug sa BOPK. Kun tinuod pa nga makatag-an kini si Luzviminda, nahibalo na unta siya kun asa nga dapit siya magpahimutang nga dili na matagbaw pagpinaabot og kliyente nga magpatagna aron makakwarta siya.
Diha sa iyang nahimutangan sa duol sa Basilica del Santo Niño matagbaw pa siya’g panghagad sa mga tawo nga moagi duol sa iyang nahimutangan aron magpatagna.
Husto g’yud si Monsenyor Achilles Dakay nga kining maong mga fortune teller dili angay’ng hatagan og igo nga pagtagad kay dili katuohan ang ilang tagna, usa ra kini ka kalingawan.
Tiaw mo, si Anabelle Rama modaug g’yud kuno batok ni kanhi kongresista Raul del Mar. Niining maong punto, ang usa ka gatus ka pesos ni Luzviminda akong pustaan og P1,000.
Bisan gani si Konsehal Rodrigo “Bebot†Abellanosa nga gitag-an ni Luzviminda nga modaug batok ni Totol Batuhan wala mohatag og gibug-aton sa maong panagna.
Ang tinuod no, kun duna may modaug sa mga kandidato sa Team Rama sa pagka konsehal, pipila ra kabuok. Unsaon nila pagdaug nga bisan gani ang media wala man makaila nila, samot na ang mga botante.
* * *
Usbon nako pag-awhag ang mayor sa Mandaue nga si Jonas Cortes nga aksyonan niya ang St. James Amusement Park, kining nagtanyag og kalingawan diha sa Mandaue North Reclamation Area.
Ayaw tugoti Mayor Jonas nga abusohan ang katawhan sa tagdumala niining maong artificial park nga pabayron nila og mahal nga entrance fee unya kun mogamit sa pansayan, pabayron pa g’yud.
Pangwarta lang g’yud ang anaa sa utok sa tagdumala niining maong artificial park kay bisan ang pansayan ilang negosyohon. Hain na man diay ang ilang serbisyo sa mga tawo nga gipabayad nila’g tag P75 sa matag sulod?
Palihug lang Mayor Jonas, sa ngalan sa katawhan, aksyoni kining maong reklamo.