Tunga na sa buwan kapin sukad gipatuman sa Department of the Interior and Local Government kon DILG ang unom ka buwan nga suspension order gikan sa Malakanyang batok ni Gobernador Gwendolyn Garcia. Duha ka semana na sab kapin nga boluntaryong gipriso sa gobernador ang iyang kaugalingon sulod sa iyang opisina tungod sa iyang pag-insister nga illegal ang kamanduan pagsuspenso niya. Gani didto na sa Kapitolyo nagsaulog sa Pasko ug misugat sa Bag-ong Tuig ang iyang pamilya.
Gawas sa mga sakop sa banay’ng Garcia nakigsawo sab nila ang pipila ka mga supporters nga anaa na sab mopuyo sa hawanan sa Kapitolyo. Sulod sa tunga sa buwan gipaningkamutan sa kampo sa gobernador kutob sa mahimo nga makakuha og Temporary Restraining Order kon TRO gikan sa korte aron mapugngan ang hingpit nga pagpatuman sa suspension order batok niya.
Gigamit na sa kampo sa gobernador ang pressure gikan sa publiko pinaagi sa pagtigom sa iyang mga supporters aron mohimo og rally pabor niya. Gigamit na sab sa gobernador ang tanan niyang koneksiyon sa politika sa pamasin nga malukmay ang Malakanyang apan inay makatabang daw sa nakasamot hinuon paghagit sa Malakanyang ang pagsalida sa mga haligi sa United Nationalist Alliance kon UNA nga sila si kanhi president Joseph Estrada, Vice President Jejomar Binay ug Senate President Juan Ponce Enrile. Wala na hinuon ko masurprisa niini. Bisan unsa pay buhaton sa kampo sa mga Garcia daw kuli na nga mapugngan ang hingpit nga katumanan sa unom ka buwan nga suspension. Kini tungod kay tataw nga giplano ning daan sa Liberal Party aron pagkuha sa bintaha alang sa mga kandidato niini dinhi sa Sugbo.
Kumbinsido ko nga sobra ra ang gipahamtang sa Malakanyang nga silot alang ni Garcia. Kumbinsido sab ko nga politika maoy nagpaluyo niining tanan. Apan unsa may kapuslanan kun padayon nga magmagahi si Gobernador Garcia pagkanaog diha sa Kapitolyo?
Una lugar, wala na siyay mahimo tungod kay nihupas na tanan niyang gahom tungod sa suspension order. Dili na siya makagamit sa pundo sa Kapitolyo pagpatuman og mga proyekto tungod kay si acting Governor Agnes Magpale na maoy giila sa mga depository bank sa probinsiya.
Ikaduha, dili makatabang nila sa politika ang pagkapyot sa iyang lingkuranan bisan kun klarong wa nay dag-anan. Sa akong nadunggan gikan sa mga yanong lungsoranon sa probinsiya, naluoy sila sa gibuhat ni Presidente Aquino sa gobernador. Ug matud nila magpabilin ang ilang suporta niini sa moabot nga eleksiyon pinaagi sa pagsuporta sa manghod niini nga si Kongresista Pablo John Garcia.
Apan wala sila makaayon sa gihimo sa gobernador nga pagmagahi sa pagkanaog sa Kapitolyo. Sumala pa nila nga dili maayo nga tan-awon ug nagpintal hinuon kini og bati sa iyang pagkatawo.
Ang tawo nga hait og salabutan sama ni Gobernador Garcia nasayod kun kanus-a angayang ipadayon ang pakigbisog ug kun kanus-a angayang mohunong ug modawat sa kamatuoran nga sa politika dili tanang panahon imoha. Kun ni Erap pa “weder weder lang”.
Kun dili man makab-ot ni Gobernador Garcia ang hustisya nga iyang gipangayo ubos ning administrasyon nga pulos pagpakaaron ingnon, sigurado ko nga sa 2013 election makab-ot niya ang tinuod nga hustisya nga iyang gibugtaw.
Ang resulta sa 2013 election maoy mohukom kun nituo ba ang mga Sugboanon sa pasangil batok niya o wala.
fplanguido@yahoo.com