Gihangop sa kadaghanan ang desisyon ni Mayor Mike Rama nga preserbahon ang templete diha sa SRP diin gipahigayon ang National Thanksgiving Mass alang kang San Pedro Calungsod.
* * *
Gihangop ang maong hukom sa mayor tungod kay ang maong templete nahimo na isip usa ka monumento alang kang San Pedro Calungsod. Ug kay monumento alang sa usa ka Santo angayan kini nga ilhon nga usa ka bantayog ug handumanan sa atong relihiyon nga Kristiyano.
* * *
Laing rason sa uban nganong angayan preserbahon ang maong templete mao nga daghan ang nakatampo bisan ginagmay lamang nga kantidad sa katukuran sa templete. Ug kadtong mga panday nga nakatabang sa pag-ugmad niini makapasigarbo sa ilang mga apo sa umaabot nga mga henerasyon nga sila usa sa nakatabang sa pagtukod niini.
* * *
Mahimo usab nga ikadugang ang maong templete sa atong mga relihiyosong butang nga modani og mga dumuduong sama sa mga turista ug mga ordinaryong biyahero. Makatabang usab kini sa pagpauswag sa tinuohang Kristiyano sa mga ulahing tubo nga mga Sugbuanon.
* * *
Busa daghan ang mihangop sa gihimo sa mayor sa pagmugna og usa ka Management Committee nga maoy moduma sa maong templete. Manghinaut kita nga ang maong desisyon sa mayor dili babagan -- ug suportahan pa gani hinuon -- sa mga kaatbang niya sa politika.
* * *
TRIVIA... Malipayon ug mabungahon nga Bag-ong Tuig 2013 ngadto sa atong mga higala ug mga magbabasa niining atong Banat News. Daghang salamat sa inyong suporta.