Sa usa ka concelebrated mass nga gihimo, ang mga V.I.P (very important persons) anha gayod palingkoron sa atubangan kay sila man ang mga sponsors sa misa sa maong kapistahan. Sa dihang nagsugod na ang misa may usa ka tiguwang nga yano ra ang pamisti nga milingkod tapad sa gobernador. Gidali dayon kini og duol sa tigdumala aron pabalhinon kay lagi gitagana naman kadto sa mga hamiling tawo. Apan nagadumili ang tiguwang ug matod pa niini nga mopahawa lang siya kung ingnon siya sa iyang anak. “Asa man dapit ang imong anak kay ipakuha tika,” tubag sa tigdumala “kanang obispo nga nagmisa”. Nanglipaghong sa kaulaw ang tigdumala.
Usahay ang dagway nga pusturawo maoy gihimong basehan sa pagkilatis sa usa ka tawo. Kay lagi ang kaanindot sa biste ug kagilaw sa mga alahas mao may makamugna og impresyon nga kini bahandianon ug wala mahatagi og gibug-aton ang matuod sa iyang pagkasiya.
Sa maong panan-awon, mamugna ang pagpihig-pihig sa pagtagad. Ang mga kabos og dagway dili matagaan og maayong pagtagad kay lagi uyamot man.
Angay natong huna-hunaon nga ang tawo gigama sama sa kasamahan sa Ginoo ug tungod niini kinahanglan nga imong mahalon sa tinud-anay.
“A true children of God are those who have a pure heart and spirit.”