Sa miaging semana 20 ka mga bata ug unom ka mga adult ang gipamusil patay sa 24 anyos nga mamumuno. Ang krimin nahitabo didto sa Connecticut sa nasud sa Amerika. Apil sa napatay mao ang inahan sa mamumuno. Gamit sa mamumuno sa iyang paghimo sa krimin mao ang tag-as nga kalibre sa mga armas. Ang mga polis nga nagsusi sa krimin miingon nga planado ang gihimong krimin sa mamumuno tungod sa kadaghan sa armas nga nakatago sa gipuy-an niini.
Ang krimin nga nahitabo sa Amerika nga naglambigit og daghang tinun-an nga biktima dili lang kini makausa nahitabo kun dili makadaghan na kini.
Sa nangaging mga buwan ug katuigan nahitabo na usab ang susamang hitabo sa Connecticut. Kining maong hitabo posibling masundan pa tungod sa kalibre sa mga tawo sa nasud sa Amerika sa pagdala og mga armas. Ang armas ugod sa Amerika yano rang mapalit sa mga Amerikano, mura lamang kini og candy nga ilang mapalit sa mga tindahan. Kun dinhi sa Pilipinas dili ta basta-basta nga makapalit ug makadala og armas didto sa Amerika sayon ra. Walay illegal possession of firearms didto. Kun dinhi sa Pilipinas ultimong paghupot og duwaang pusil salaud didto sa Amerika dili. Mao ni ang mga rason nganong posibling aduna pay lain unyang susama aning hitabo ang mahitabo sa umaabot nga mga adlaw, buwan o mga katuigan.
Ang mga masaker sa mga tinun-an sa mga tunghaan sa Amerika mao ang usa sa mga primyo sa tumang kagawasan nga ilang napahimudsan gikan sa ilang kagamhanan. Kun gusto man sa mga Amerikano nga malikayan ang susamang hitabo sa umaabot mas maayo seguro nga ilang limitahan ang paghupot og armas. Ang pagbutang og limitasyon sa paghupot og armas sa mga Amerikano dili makapaubos ug makapaminus sa ilang demokrasya ug kagawasan hinuon makahatag kini og kaseguroan sa kinabuhi sa mga Amerikano ug sa mga posibling biktima.
Sa iyang mensahi mahitungod sa hitabo, wala kapugngi sa pangulo sa Amerika nga si Barak Obama ang pagpadagayday sa iyang mga luha tungod sa kalooy sa mga nabiktima sa krimin apan ang maong mga luha dili na makapabalik sa mga kinabuhi nga nakalas hinuon ang maong mga luha dako og mahatag nga kaayohan sa mga Amerikano kun ugaling mao kini ang mahimong hinungdan sa pagbutang niya og limitasyon sa mga Amerikano sa paghupot og mga armas.
* * *
Ako na upod nga pasalamatan dinhi ang mga miayuda sa gipasiugdahan nga kalihokan sa TAMA organisasyon sa Barangay Quiot, Cebu City diin sobra sa usa ka gatos ka mga sakop niini ang nakadawat og mga pinutos nga bugas, tanghon ug sardinas. Tungod sa ilang pagsuporta ako nga pasalamatan ang Supreme Student Government sa Southwestern University pinaagi sa ilang abtik nga presidente nga si Danny Torralba ug ang New Generation Against Drugs and Corruption - NEWGAD, Inc. nga maoy miabag kanamo aron magmalampuson ang among gihimong kalihokan.
Kaninyo salamat sa inyong sayong pinaskohan.