Nagmalampuson ang gipahigayong 39th Fire Service Recognition Day nga gipahigayon sa SM City Consolacion gahapon Nobiyembre 30, 2012.
Gisugdan ang kasaulogan pinaagi sa usa ka Santos nga Misa ug misunod dayon ang pormal nga programa nga gipangulohan sa among Regional Director Sr. Supt. Ma. Luisa C. Hadjula, MM.
Ang pinasidunggang dinapit sa maong programa mao ang kalihim sa Department of the Interior and Local Government (DILG) nga si SECRETARY MANUEL "Mar" ROXAS III.
Gihatagan og mga pasidungog ang mga nagkalainlaing local government units pinaagi sa ilang mga local chief executives nga maoy midawat sa plaque of recognition sa dakong natampo niini alang sa paglambo sa matag fire station sa ilang lugar.
Lakip nga gihatagan og pasidungog mao ang mga dagkong opisyal ug ingon man ang mga non-officer rank sa Bureau of Fire Protection Region 7 tungod kini sa ilang talagsaong dedikasyon sa trabaho nga ilang gipakita nga nakahatag gyud og impact sa fire service ngadto sa publiko.
Ang maong pasidungog tukma ug angayan lamang aron madasig pa atong mga kabomberohan nga mopakita og talagsaong labok aron mas molambo pa ang pagpadangat sa serbisyo publiko. Gani ang inyong ubos nga alagad usa man sa nakadawat og "Medalya ng Papuri". Sa tanang awardees congratulations natong tanan.Hinaut nga ato pang patas-an ang kalidad sa atong pag-alagad sa publiko kay serbisyong tinud-anay man kaha kining atoa.
Sa pikas bahin, daw dili mahagbongan og dagom ang grabeng duot sa katawhan sa South Road Property sa gipahigayon nga National Thanksgiving Mass alang ni San Pedro Calungsod.
Atong makita ang pagkama- inampoon ug pagkarelihiyoso gyud natong mga Pilipino. Para nako, angayan lang gyud siguro nga himoon ang maong misa nga grandyoso apan nagpabilin gihapon ang pagka solemn niini.
Kanus-a pa kaha masundan kining maong kalamboan sa katolikong simbahan nga duna napo'y ibayaw nga santo sa umaabot. Viva San Pedro Calungsod!
Sa katapusan, dili na gyud nato mapugngan ang pag-abot sa Pasko sa pagkatawo sa Labaw’ng Makagagahon. Gani karong adlawa ang labing unang adlaw sa kataposang buwan sa tuig.
Nagpakli na usab kita sa atong kalendaryo ug nagpasabot lamang kini nga taliabot na ang adlaw sa dakong pagmaya uban sa atong pamilya ug mga higala. Gani ang uban nakahuman na sa pagpamutang og dayandayan alang sa Pasko ug ang uban usab mao pa'y pagsugod sa pagpangadorno.
Sa makausa pa among giawhag ang publiko sa pagbantay sa mga series lights nga pwerte ka barato sa presyo nga daw ipanghatag na lang kini kay murag kadudahan ang kalidad niana. Magmatngon unta kitang tanan sa pagamit niini aron makalikay kita sa sunog.
Dili nato ibutang sa peligro ang mga miyembro nato sa panimalay gumikan sa pagpalit nato sa mga baratohong series lights. Apan bisan tuod og mahalon imong napalit nga series lights ug nakasiguro ka sa kalidad niini dili maayo nga walay palong palong ang imong series lights.
Ang tanang mga dekuryenteng botang bisan og mahalon kini dili gayud kita makasiguro nga luwas na kita sa sunog kun sa atong pagamit niini walay pahuway ug pinasagdan na lamang.Angayan natong hibaw-an nga kinahanglan gayud nga papahulayon usab nato ang atong mga dekuryenteng butang aron hingpit kitang luwas sa sunog.