Ubay-ubay na ang mga opisyal sa kapolisan nga narelibohan sa ilang pwesto tungod sa nagpadayong “one strike policy” nga gipatuman ni Chief Supt. Marcelo Garbo, hepe sa kapolisan sa rehiyon, batok sa illegal nga sugal.
Ang maong mga opisyal nasakpan ni nga dunay operasyon sa illegal nga sugal sa ilang jurisdiction hinungdan nga gihulipan sila sa pwesto. Ang labing awahi nga casualty sa maong kampanya mao sila si Chief Insp. Pablo Cabildo ug Senior Insp. Ranulfo Espina sa Waterfront Police Station; Insp. Juan Capacio sa Marigondon Police Station, ug Supt. Henry Binas sa Toledo Police Station.
Nindot ang maong kampanya ni Garbo apan kinahanglang patas ang pagpatuman niini. Kinahanglang way pagpinig ang iyang pagpatuman niini aron dili ma-demoralize ang ubang mga opisyal labi pa intawon kadtong mga opisyal nga dili gradwado sa akademiya.
Dili husto ang gihimo ni Garbo nga gipalabay ang kapakyas sa hepe sa kapolisan sa Sawang Calero ug sa Pardo bisan kun sila napakyas sab pagsanta sa illegal nga sugal sa ilang dapit. Labaw nang dili husto ang iyang pag-angkon atubangan sa ubang mga opisyal sa kapolisan ug sa mga sakop sa media mismo nga wala niya hulipi ang duha bisan kun dunay sugal sa ilang dapit tungod kay dunay mga senior officials nga nangabogar kanila.
Wala gyud siya maikog nga dunay ubang mga opisyal ug sakop sa media nga naminaw dihang iyang gitug-anan si Sr. Insp. Noel Lomente, hepe sa Sawang Calero, nga diriyot ni matangtang sa pwesto kun wala pa ang iyang senior sa Philippine National Police Academy nga si Chief Insp. George Ylanan nga maoy nangabogar niya.
Nahibawo ko nga normal na ang “bata-bata system” sa han-ay sa kapolisan, apan hinaut nga dili pod unta ingon niini ka garapalan. Una lugar, dili husto nga “double standard” ang kapolisan sa pagpatuman sa ilang polisiya.
Ang maong sistema makadasig sa ubang mga opisyal nga mangita og padrino hangtud nga magsalig na lang ug dili na molihok. Dilikado sab ang maong sitwasyon nga magamit ang mga hepe sa kapolisan sa mga impluwensiyado nga mga politiko.
Unsa kahay posibli nga mahitabo og ang tanang hepe sa kapolisan modangop og mga politiko aron mangabogar nila pagsiguro nga dili sila basta-basta nga mahulipan sa pwesto? Basin moabot ang panahon nga mobalik sa karaan diin ang mga polis gigamit nga private army sa mga gamhanang politiko.
Ug dili ni malikayan kun ang “bata-bata system” maoy pamaagi nga sagupon sa atong kapolisan.
* * *
Ako sab nga giawhag si Garbo nga gawas sa sugal iyang hingusgan ang kampanya batok sa illegal nga drugas. Ako man gud nga namatikdan nga bugnaw pa sa simud sa itoy ang iyang pagtagad sa suliran sa drugas.
Dili ko ganahang motuo sa daghan kaayo nga mga negatibo nga impormasyon nga akong nadawat, apan kun pabiling uwahi sa iyang prioridad ang kampanya sa drugas dili malikayan ang mga pagduda.
Hinaut nga way opisyal sa kapolisan dinhi sa rehiyon nga nagtago luyo sa uniporme apan disipolo diay sa demonyo.