Hapit na mapupos ang usa ka semana nga gihatag ni Mayor Michael Rama nga tagal alang sa mga opisyal sa kabarangayan nga markahan nila’g FOR OFFICIAL USE ONLY ang matag kilid sa ilang sakyanan nga giisyu sa City Hal
Apan hangtud karon nakakita pa ako og mga sakyanan nga giisyu sa City Hall ngadto sa mga barangay nga padayong nagdagan-dagan nga walay marka nga FOR OFFICIAL USE ONLY ang kilid.
Nalipay ko kay giaksyonan dayon ni Mayor Rama ang lindog nako sa The Freeman, ang BIRADOR kaniadtong Martes nga nagtuki niining maong isyu ug mimando dayon siya sa General Service Office (GSO) nga markahan ang tanang sakyanan.
Aron patas, dili kay ang mga sakyanan lang sa kabarangayan ug sa City Hall nga giisyu sa mga opisyal. Awhagon nako si Mayor Rama nga susihon kining report nga akong nadawat nga ang duha ka sakyanan nga giisyu sa City Hall ngadto sa Cebu Investment Promotions Center (CIPC) giilisan og “green plate.”
Kun tinuod man gani ang report nga miabut nako, angay nga dili kini palabyon ni Mayor Rama kay usa kini ka “hiwi” nga binuhatan nga supak sa iyang slogan nga mao ang Tul-iron ang Hiwi.
Gidayeg gani ug gisaludohan nako ang pipila ka opisyal sa City Hall nga wala na mogamit sa sakyanan nga giisyu kanila paghatud-kuha sa ilang anak paingon sa tunghaan. Akong nasayran nga ang usa ka opisyal mipalit na lang og kaugalingon niyang sakyanan, ang usa mopasakay apan igo lang i-agi sa tunghaan ang bata kay agianan man ‘sab.
Kaniadto kay gikan sa laing tunghaan, ihatud pa man g’yud sa laing tunghaan. Nalipay ko kay ang maong mga opisyal, pulos mga buotan nga makasabot nga dili tukma ang ilang gihimo.
Kadtong barangay kapitan nga mitaptap og itum nga bildo sa plate number sa iyang sakyanan, giingong mitangtang na sa maong itum sa bildo. Salamat kaayo Capt. Mao kini timan-i ninyo nga dunay mga tawo nga nagpaniid sa inyong mga lihok.
* * *
Pipila ka konsehal sa dakbayan sa Sugbo mitug-an nako nga duna sila’y pasakaan og kaso nga kawani sa City Hall kay mobiya sa ilang trabaho kay magprograma sa radyo atul nga ting-trabaho pa.
Buyno, sa akong pagtimbang-timbang mahimong makalingkawas man ang maong kawani kun maprobar niya nga ang maong programa nga iyang gidumala gibayran sa dakbayan alang sa pagsabwag og inpormasyon.
Apan kun dili niya kini maprobar, ambut lang, mora’g mag-atubang g’yud siya’g problema kay unsaon man niya sa pagtubag. Maisip nga nag-moonlighting siya atul sa mga oras nga gibayran siya sa kagamhanan?