Layo na og naabtan ang social media diha sa kinabuhi sa tawo. Hangtod ang pagtuo (faith) ug ang pagbuhat subay sa pagtuo mahimo na karon ipaagi sa internet.
Una nako kining nakat-onan pinaagi ni Fr. Roy Cimagala, kolumnista sa The Freeman, nga hilabihan ka-aktibo sa Facebook. Gikan sa ebanghelyo sa adlaw nga saw-an sa daghan niyang sumosunod hangtod sa pagsabwag sa ministeryo sa pagka-pari ang kanunay’ng mabasa ug makit-an sa Facebook account ni Fr. Roy.
Apan motuo mo’g sa dili, ang pag-debosyon sa Birhen sa Regla sa dakbayan sa Lapulapu nakaabot na usab sa social media.
Ang Facebook page sa City Government of Lapulapu giduaw og daghang mga Facebook users aron “managkot” ug mangaliya sa Kahitas-an pinaagi sa panabang sa Mahal nga Birhen sa Regla.
Hangtod niadtong miaging adlaw, ang photo album sa Birhen sa Regla diha sa FB page sa Lapulapu giduaw og 41,672 sukad pag-post niini usa ka semana na ang nakalabay.
Aduna kini 5,376 like, 754 shares ug 128 comments.
Ang makapanglimbawot–balhibo nga comment mao ang pagpangayo og anak pinaagi sa Birhen sa Regla. Adunay uban mi-greet sa kapistahan sa mga Oponganon ug pagpasalamat sa grasya nga nadawat. Kining nanuaw sa Facebook page sa Lapulapu mga deboto kini sa Birhen apan dili na makaduaw sa Lapulapu kay tingale tua na sa layong dapit sa abroad o dinhi sa nasud.
Salamat sa kagamhanan sa Lapulapu nga nakahunahuna pag-post sa mga hulagway sa gipistahan karong adlawa nga Birhen sa Regla. Maayo na lang kay ang mga dili makalabang sa Mactan Channel pagduaw kaniya makaduaw diha na lang sa Facebook.
* * *
Interesado si Bokal Teddy Ouano sa nahitabong pagpaundang sa makadiyot sa operasyon sa Kepco-SPC sa dakbayan sa Naga. Iyang gisulatan ang Koreano nga presidente sa maong power plant nga si Bong Joo Choi. Gipahinumdoman ni Ouano si Choi sa bag-o lang napasar nga Cebu Environmental Code diin matud niya diha sa iyang sulat pinetsahan Nobiyembre 19 nga ang coal ash pollution sa Naga tungod sa presensiya sa Kepco-SPC “alarming” na.
Diha sa iyang sulat nangutana si Ouano kang Choi kun gipatuman ba diha sa planta ang mga lokal ug nasudnong mga balaod sa kalikupan sama sa Clean Air Act ug uban pa; ug gituman ba sa Kepco-SPC ang maong mga balaod.
Nangutana usab si Ouano sa penalty ug compensation nga gihatag sa Kepco-SPC ngadto sa komunidad nga nadaot tungod sa polusyon nga gihatag niini ug unsa kamatinud-anon ang Kepco-SPC pagtug-an ngadto sa publiko sa tinuoray sitwasyon ug ang pagpa-apil sa komunidad sa monitoring ug decision-making.
Ang aksiyon ni Mayor Valdemar Chiong suportado sa kagamhanan sa lalawigan. Kun padayon nga lapason sa Kepco-SPC nga gidumala og mga Koreano ang balaod sa kalikupan, maayong sirad-an na lang kini sa dayon.