Nakadungog -- kon nakasuway -- na ba mo og softdrink nga ihi sa baka? Wa pa ko kasuway apan nakadungog na ko nga duna.
* * *
Suma pa sa libro nga mida sa title nga “Uncle John’s Endlessly Engrossing Bathroom Reader,” published by Bathroom Readers’ Press didto sa Ashland, Oregon, USA, ang Cow Protection Department sa Indian Government, mipagawas og softdrink gikan sa ihi sa baka.
* * *
Ang urine soda gisagulan og medicinal herbs ug ang tanang toxin gikuha. Ang soda kon softdrink wa manimaho nga ihi ug lami imnon sama ra sa softdrinks sa tindahan.
* * *
Matud pa sa atong tinubdan, naninguha ang health authorities sa India sa paghimo niining ihi nga softdrink aron ang mga Indian adunay “healthy alternative” sa Coke ug Pepsi. (Bisan pa, Coke o Pepsi ra ang akoa.-- JVJ)
* * *
Sa laing bahin, bisan pa sa ilang giingon nga dili maayo sa panglawas ang softdrink, wala gihapon mobahar kon momenus ang consumption sa soda sa Pinas. Hinuon, suma pa sa balita nagkadaghan na ang naanad sa pag-inom og mineral water.
* * *
Naa sad koy nahibaw-an nga tawo nga moinom sa iyang ihi isip tambal kuno sa iyang sakit diin way tambal nga nakahatag og kaayohan kaniya. Usa siya ka komentarista sa radio sa binisaya. Ambot hain na siya ron wa na ko makadungog kaniya.
* * *
TRIVIA. Kumusta diha sa atong mga higala sa passenger terminal sa mga fastcraft ug barko para Bohol ug Leyte. Salamat sa inyong suporta sa Banat News.