Sa panuigong siyete anyos si Lolong ang nisugod pagtungha sa unang grado sa Carcar Elementary School. Ang batang si Teofilo ang gihulagway nga usa ka hilomon nga bata ug dili gani mangita og away bisan pa man sa mga higayon nga siya pasakitan sa mga bugoy nga kabataan. Ang iya hinuong igsuong si Tereso ang nahimo niyang manlalaban. Pagkahuman sa Ikapitong grado ang bata nga si Lolong ang niundang pagtungha og usa ka tuig ug nitabang sa iyang amahan sa panguma. Aduna siya’y kaikag ug paghigugma diha sa panguma nga tungod niini buot niya nga mokuha sa kursong agrikultura apan wala motugot niini ang iyang inahan sa kapasikaran nga dili siya buot nga mahilayo kaniya si Lolong. Ang maong kurso ang gitanyag lamang didto sa Mindanao.
Pinaagi sa madasigong pag-agni sa iyang magulang nga si Padre Diosdado Camomot, si Lolong misulod sa Seminario Menor de San Carlos sa Mabolo, dakbayan sa Sugbo niadtong tuig 1932. Nadawat niya niadtong tuig 1939 ang tonsure ug minor orders, naordinahan siyang sub-deacon niadtong tuig 1940 ug niadtong tuig 1941 siya giordenahang pari didto sa Katedral sa Sugbo pinaagi sa pagpandong sa mga kamot sa iyang Talahuron: Obispo Gabriel Reyes ang Obispo sa Sugbo niadtong panahona. Malisud ang maong mga panahon sanglit, mibuto naman ang Ikaduhang Gubat sa kalibutan. Human sa iyang ordenasyon, nangalagad siya isip kaabag sa iyang magulang nga si Padre Diosdado sa Parokya sa San Fernando. Sumpayan pa