Nagdasok na ang mga bag-ong botante nga nagparehistro sa mga buhatan sa Comelec niining nagsingabot nga Oktubre 31 nga maoy deadline sa rehistrasyon.
Wa ra bay ihatag nga extension ang Comelec sa maong rehistrasyon.
Kasagaran sa mga botante nga way kaikag sa pagpalista sa ilang pagka-botante mao kadtong wa makasabot unsa kamahinungdanon ang pagbotar sa panahon sa election dinhi sa atong nasud.
Sa laktod mura sila og di mga Filipino nga way pagpakabana bahin sa mga balaod nga gipatuman sa kagamhanan ilabi na ang bahin sa pagbotar sa panahon sa election.
Apan kun may hunahuna man, nga sila tarong nga mga lungsuranon, ang nagpasulabi sa ilang galamhan mao ang kinaiya sa mga Filipino nga taspokan ug anha na molihok sa ultima ora na sa iyang mga gimbuhaton.
Maoy hinungdan nga gumikan sa maong kinaiya, daghan kaayo ang nag-uylahot sa panginabuhi, lahi sa mga Insek nga gumikan sa kakugihan maoy nagdominar sa negosyo ug ekonomiya sa nasud.
Kana lang bahin sa “time” usahay makabintaha ang mga Filipino kun kining isyuha maoy tukion.
Kay ang tinuod adunay gitawag nga American time, diin naandan sa mga Amerikano nga usa o duha ka oras sa di pa ang untop nga oras nga gitakda sa aktibidad o trabaho anaa na sila sa lugar diin ipahigayon ang kalihokan.
Susama gihapon niini ang Christian time nga sa panahon sa pag-abot sa untop nga oras sirad-an ang pultahan sa simbahan ug ang mga taspokan di na pasudlon.
Apan sa Filipino time, usa ka oras human sa untop nga takna sa kalihokan mao pay iabot sa mga taspokan.
Hinuon kadtong naanad kaayo sa pagsunod sa Filipino time makapangatarungan usahay nga mas maayo pa kuno ang Filipino time kay sa Indian time.
Kay ang Filipino time tungahon gyud sa Pinoy nga taspokan, apan ang Indian time, bisan anino di hikit-an ug ingnon dayon nga nangIndian.