Dear Tito Miguel
Naa koy igsuon babae, naa siya'y upat ka anak. Gibiyaan sa bana kay naay kapuyo ron. Bag-o pa lang sila sa kapuyo pero naa na silay anak. Ang ako lang Tito, mangayo lang unta ko sa suporta sa amahan sa mga bata Tito, kay ako dalaga, ako pay nagbuhi sa akong mama ug akong mga pag-umangkon. Tambagi ko Tito. — Single
Single,
Ang imong igsuon maoy angay mamugos pangayo’g suporta sa amahan sa iyang mga anak. Ila kining responsibilidad, dili imoha. Karon kun magdumili o mura’g way nadunggan o dili ba kaha mosaad apan dili motuman, kinahanglan na’g puwersa sa balaod.
Imong igsuon angay modangop sa abugado aron matambagan ug magiyahan siya unsay angay nga buhaton aron mapugos pagsuporta ang amahan sa mga bata. Sa akong nahibaw-an, ang mga ginikanan mahimo pasakaa’g kaso nga civil kun ilang talikdan ang responsibilidad ngadto sa ilang mga anak, labi na’g sila menor de edad. Apan ang kantidad nga madawat isip sustento depende sa katakus sa amahan ug panginahanglanon sa mga anak. Kining duha balansehon sa korte.
Dili lamang civil, mura’g mahimo sab pasakaa’g kaso nga kriminal ang amahan kun iyang ihikaw ang pinansiyal nga suporta kay usa kini ka matang sa abuso ngadto sa mga babaye ug ilang mga anak. Apan kay dili man ko abugado, kinahanglan gyud mo mokunsolta’g lisensiyado.
Buhata kini kay lagmit ikaw ang maalaot mosawo sa responsbilidad nga wa kay labot. Unta ang iyaan sama nimo mosuporta lamang sa ginagmay o dili ba kaha igo ra mopahalipay, dili kay mao nay magsagubang sa tanan nilang panginahanglan. Pero lagmit mao ni mahitabo kanimo kay di man ka kaagwanta pasagdan imong mga pag-umangkon. Apan hunahunaa usab imong kaugalingon. Gusto ka magpabilin nga single apan ang kabug-at sa responsibilidad sobra pa sa double? —Tito Miguel
Magpatambag ka? Ipada kang Tito Miguel: 0998-581-5856