Kun dunay nabuhat nimo sa dugay nang panahon, unya gusto nimong usbon, unsa man?” ni Sheena, usa ka psychologist, nga gustong mopuga sa pangisip sa amahan.
Nagkaistorya sila, dihang diyutay na lang ang bisita. Nagsaulog sa ika-60 nga adlaw’ng natawhan si Ruben Garay, usa ka CPA. “Imo gyud kong gipugos paghinumdum sa nanglabay. Ok, kadtong maestra nako sa grade 5 sa 1967. “Ha? Giunsa man diay nimo imong maestra?” ni Sheena. Naisang kilay. “Maldita kaayo siyang maestraha. Apan badlongon sab tingali kong pagka-pupil”. “Unsa may nahitabo?” “Nagdumot ko niya. Kay kanunay kong kastigohon. Labayon ko’g libro, eraser. Bunalan ko’g stick. Luniton akong dunggan. Kusion akong bugan. Gisulat pa gyud niya sa akong report card nga he is very unruly.”
“Giunsa man nimo pagpakita imong pagdumot?” “Wa koy gibuhat. Pero nilabay ang mga katuigan. Nigradwar ko’g elementarya, hayskul, wa na mi magkakita. Apan pag-edad nako’g 17, nieskuyla ko’g Nautical. “Nautical may una nakong kurso sa wa pa ni-shift sa Accountancy”. “Mao ba?” “Angayan kaayo ko’s akong uniporme nga all white. Usa ka buntag, nipara ko’g dyip depasaheroan padulong sa eskuylahan. Nakasakay nako si Maam. Paglingkod nako sa iyang atbang, iya dayon kong gipahiyoman. Nakaila siya nako tungod sa akong nameplate. Garay, R nga mabasa sa dughan sa akong unipormi”. “Unya unsay sunod nahitabo?” “Wa gyud ko nitagad niya. Nagpakaaron-ingnon ko nga wa kakita o wa kaila niya.
“Sa hunahuna nako, nakabawos na gyud kong Miss Jurado”. “Unya nganong nagmahay man ka?” “Adtong higayona, kay nagdumot man gyud ko niya, para nako insakto akong gibuhat. Apan karon nga tiguwang na ko, wa nay bisan gamay nga kayugot o kaligutgot sa isigkatawo, nakaamgo ko nga sayop akong gibuhat”. “Kun mobalik pa ang panahon, unsa may imong buhaton?” “Akong greeton si ma’am. Ug pangumustahon. Kalimtan ang nanglabay”. “Happy birthday, Pa. And may you have many more,” ni Sheena. Nihawok sa aping sa amahan. “Thank you, anak. This is my happiest birthday. I’m very thankful to God of my blessings”. (Kataposan)