“Mag-live-in na lang ta. Perl, tulo ka tuig na tang uyab. Nasinati na nato ang usag-usa,” ni Greg ngadto sa iyang uyab nga si Perla. Ning kilumkilum nanglingkod sila sa usa ka lingkuranan sa plasa sa ilang lungsod atubangan sa munisipyo. Dikit kaayo silang nagtupad. Nag-agbay ang ulitawo sa dalaga. “Sayonan ka man lang anang live-in. Bantog rang si papa nga biyudo na, may ka-live-in, imo kong pasun-on niya?” ni Perla. “Uso na man ron. Ako bitaw, gianak ni mama nga way kasalkasal sila’s papa. Kadtong amahan nako, nieskapo pagtug-an ni mama nga buntis na siya,” ni Greg. “Maayo gani imong mama gipangasawa og Amerkano unya gidala sa America.”
Tungod sa kabuhong ni Greg sa kuwarta, kay iyang mama tuas Amerika, nagtrabaho sa usa ka five star hotel ug may allowance sa iyang bana nga ex-marine, wa kahuman og kurso. Igo rang nakahuman og hayiskul. Kay barkada diri, barkada didto. Nakaapil og bisyo sa shabu. Naundang karon tungod sa tokhang.
“Kahayahay nimong manghagad og live-in. Unsa may ibuhi nimo nako? Kapritso ra ba ko”. “Way problema. Naa man koy ATM”, ni Greg. Mapasegarbuhon. “ATM sa imong kagaral. Wa man kay trabaho”. “Naa lagi koy ATM. Pakasal ba hinuon ta. Aron kun petisyonan kong mama, dala sab ka” “Pila may makobra nimo sa ATM matag bulan? “Depende.” “Nganong depende man?. “Depende sa kantidad sa bayranan. Mo-text ra kong mama ini’g dawat nako sa mga bill sa kuryente ug tubig.” “Unsaon nimo pag-text?” “Ay ta ma para palit bugas; ay ta ma para palit sud-an; ay ta ma para bayad kuryente; ay ta ma para bayad tubig. Kun naa na tay anak, ay ta ma para palit gatas ug diaper.”
“Kakolongo gyud nimo oy!” ni Perla. Gikosokoso ang ulo sa uyab. “Ang kaguwapo ra gyud nimo imong puhonan. Mama’s boy”, ni Perla. Nitindog. “O. Asa na man ka?” ni Greg. “Pauli na. Hunahunaon ko pa nang imong sugyot,” ni Perla. May tawo gyud nga suwerte sa kinabuhi. Kay di kinahanglang magpatulo og singot aron mabuhi. Kay may ATM.