Gula 118
"Sige ate toltoli unya ko sa imong puy-an ha aron maduaw sad tika," matud pa ni Otoy.
"Oo dong adto unya ta," ni Erica pa, dayon gialsa ang gamay'ng bag nga maoy kataposan niyang gamit. Migakos una kini sa ubang mga igsuon gawas kang Lenny dayon migawas ug misugat niya si Andy. Gikuha sa lalaki ang gamay niining bag ug mipaingon ngadto sa sakyanan sa lalaki.
Napahimutang na ang tanang gamit sa huna-huna sa babaye mingaw man nga dili niya ikauban sa pagpuyo ang mga igsuon pero kinahanglang antuson niya tungod ug alang sa iyang ambisyon. Padayon ang pagtrabaho ni Erica sa club sa samang paagi dili gihapon manawat og customers ang babaye. Sa gihapon maghatagan siya'g kuwarta sa iyang mga igsuon bisan og may nagpahiping kaguol sa dughan niini pero gipugos niya nga dili magpaapekto. Usahay manghagad si Andy nga mangadto sa ilang beach house sa norte kuyog usab nila si Melche nga maoy nahimong buddy-buddy sa dalaga. Malipayon ang dalaga uban kang Andy nanghinaut nga unta si Andy maoy una ug kataposang lalaki nga higugmaon padayon ang pag-eskwela ni Andy. Nahimong mabulokon ang matag adlaw tungod sa nahimo niining inspirasyon nga si Erica suportado niya ang babaye hatud-kuha sa trabahoan. Mi-suggest pa ang bayot nga si Melche nga ipaila-ila na si Erica sa mga ginikanan ni Andy apan hugot nga mibalibad ang dalaga. Dili pa kini andam kay sigun sa nasayran niini matapobre ang inahan sa hinigugma.
Unya na siya mokuyog sa hinigugma kun may saktong titulo na siya nga sarang ikapanghambog ngadto sa adunahang ginikanan ni Andy . Doble ang paningkamot ni Erica kay may mga igsuon nga gisuportahan ang uban niyang mga igsoon migradwar na sa elementary. Pulos kini nag-eskwela nga siya ang naningkamot Usahay hatagan siya'g kuwarta ni Andy aron sa gamay’ng paagi makatabang usab kini sa iyang mga panginahanglanon. Miabot ang adlaw nga migradwar sa high school si Erica. Gikan sa seremonyas sa eskwelahan milahos kini ngadto sa sementeryo nga dala ang diploma kinuyogan gihapon ni Andy ug ni Melche. Mibaha ang daghang luha sa ibabaw sa lubong sa iyang inahan.
"Ma unang pirasong papel ang akong nadawat agi'g kalamposan sa akong mga pagpaningkamot mao ni ang akong gasa nimo ma bisan anaa kana sa laing kalibutan. Nahibawo ko napasaylo ko nimo sa wala ka pa mobiya namo kay pinaagi sa imong mga luha niadtong adlaw nga gibawian ka sa imong kinabuhi para nako, nagpasabot kadto nga napasaylo mo ako labaw sa tanan nagpasabot nga mahal sab ko nimo.
Usbon ko ug dili ko pul-an moingon nimo nga pasayloa ko apan ania ma dala ko ang usa ka pirasong papel nga magmatuod sa atong kalamposan. Kini mao ang atong gipangandoy dili ba ma? Kun buhi ka pa lang unta tingali proud sad ka nako kay bisan sa hugaw'ng huna-huna sa uban batok nako nia ikapamatuod ko nga nahipunta sa maayong padulngan ang matud pa nila nga salawayong babaye. Pero para nako ma dili ko tantong salawayon kay usbon ko wala ko magbaligya sa akong dungog. Usa lang ka lalaki ang nakahilabot nako usa ka lalaki ang gitugyanan ko sa akong pagkababaye nga way bugting salapi. Gitugyan ko kini gumikan sa gugma dili gumikan sa salapi. Nahibawo kong nakabati ka nako karon ma. Nahibawo kong nalipay ka ining kalamposan nga akong nadawat karon. Dili pa ni mao ang kataposan sa akong pangandoy ma. Unang ang-ang pa lang kini paingon sa matuod nga kalamposan ang mo-gradwar ko sa college. Dinhi mismo sa ibabaw sa imong lubong sa gihapon isaad ko maningkamot ko para sa akong ambisyon ug sa akong mga igsuon. Amumahon ko sila dili pasagdan bisan pa man sa kayugot ni Lenny nako pero dili mahitabo nga tugbangan ko'g kayugot ang iyang gibati diri nako.
Okay na para nako nga modawat siya kun unsay akong ihatag sa pamilya. Modawat siya para sa iyang kinahanglanon kay sama nako nag-eskwela usab si Lenny. Sa sunod tuig mo-gradwar na usab si Lenny sa high school. Sa kataposan ma moingon ko nga mahal ta kaayo ka. Magpabilin ka diri sa akong dughan mama Minda,” Ni Erica pa nga hinay'ng mihilak nagpanghikap sa lapida diin tua nakakulit ang pangalan sa iyang inahan. (Sumpayan)