“Pre Rene, sayo tas bulangan sa Tejero kay may 3 cocks derby karong adlawa!”
“Ayaw’g kalimot, Bay Ren! Sama sa naandan, adto tas resto bar karong gabii. Enjoy ta sa way tihiktihik nga inimnanay uban sa atong mga alalay!”
“Boss Ren, giandam na nako ang labing guwapa ug seksing alaga sa casa nga para nimo karong gabii! Mao ra gihapon ang naandang presyo nga di ikatali og resibo! Ikaw na gud ni!”
Pa, pulos na mga bag-o ang atong sopa, magic sing ug refrigerator! Palit na sab og bag-ong 40 inches nga colored LED TV aron mailisdan na kining daan natong telebisyon! Di ba misaad man ka nga mopalit ka’g bag-ong dakong TV...!”
Igo lang nakapanglingo si Rene. Nagsungog sa iyang kaisipan ang tanang hangyo nga alang lamang sa kaugalingon niyang kalipay ug katagbawan. Apan hugot na ang iyang hukom karon. Biyaan na niya ang tanan niyang mga bisyo. Batonan na niya ang pagdumili sa iyang kaugalingon. Karon nga nabiyudo na siya, nakahukom siya nga ipukos na lang niya ang iyang panahon sa gipundar niyang kaugalingong five-six nga negosyo sa tanang merkado publiko sa siyudad. Ipukos na lang niya ang iyang atensyon sa kaugmaon sa bugtong anak niyang lalake nga nag-teenager na. Biyaan na niya ang pagkasugarol sa bulangan, ang pagkapalainom sa beer nga ilimnon sulod sa resto bar uban sa mga barkada nga siya ang mobangka sa gasto ug talikdan na niya ang pagkahimabaye sa banayrang kalipay.
Sa laktod, nakahukom na si Rene nga hikalimtan na gayud niya ang kaugalingon niyang kalipay ug kaayohan, ug ipukos na niya ang iyang kaugalingon sa pagtabang sa mga silingan ug kahigalaan nga nagkinahanglan sa iyang panabang pinansyal sa mga nasunogan sa way ikapalit og pagkaon ug tambal ug uban pang panginahanglan nga alang sa kaayohan sa uban.
“Ginoo, salamat nga nalamdagan nimo ang akong kaugalingon sa pagdumili, nunot sa hingpit ko nang pagbag-o...!” nagkibutkibot ang baba ni Rene nga misulod sa simbahan sa Basilica Minore Del Santo Niño aron sa pagtambong sa hapunong misa ning adlaw nga Biyernes. (Katapusan)